АҚШ ва Буюк Британия Италиядан Ямандаги ҳусийларга зарба беришда иштирок этишни сўради, бироқ рад жавобини олди. Бу ҳақда ҳукуматдаги манбага таяниб, Reuters хабар берди.
“Италия АҚШ ва Буюк Британиянинг Ямандаги ҳусий объектларига қарши тунги зарбаларида иштирок этишдан бош тортди”, — дейилади хабарда.
Reuters суҳбатдошига кўра, Рим Қизил денгизда “тинчлантирувчи” сиёсат юритишни афзал кўрмоқда. Бундан ташқари, ҳукумат ҳар қандай ҳарбий ҳаракатларда иштирок этиши учун парламент ёрдамига муҳтож бўлиб, тезкор қарор қабул қила олмайди.
АҚШ ва Британиянинг ҳусий объектларига ҳужуми
АҚШ ва Буюк Британия 12 январь куни Яманнинг турли ҳудудларидаги тўрт провинция, жумладан, пойтахт Сана, Ҳодейда, Таиз ва Саададаги нишонларга ҳаво ҳужуми уюштирди. Ҳусийлар жавоб зарбалари берилишидан огоҳлантирди.
“Биз Яманга қарши бу тажовузни мутлақо оқлаб бўлмаслигини тасдиқлаймиз, чунки Қизил ва Араб денгизларида халқаро юк ташиш учун ҳеч қандай таҳдид йўқ эди”, — деди ҳусийлар матбуот котиби Муҳаммад Абдулсалом.
Ўз навбатида, Яман ҳусийлари ўз назорати остидаги ҳудудларда мажбурий сафарбарлик эълон қилди.
“Бизнинг халқимиз кўплаб вилоятларда ҳарбий сафарбарлик тадбирларига ўтди, сафарбарлар сони эса минглаб”, — деди “Ансор Аллоҳ” ҳаракати етакчиси Абдел Малек ал-Ҳусий.
У ҳусийлар тарафдорларини қийин вазиятга қарамай, ҳарбий тайёргарлик ва намойишларни давом эттиришга, шунингдек, пул хайрия қилишга чақирди.
Изоҳ (0)