Афғонистоннинг Ўзбекистон ва Тожикистон давлатлари билан чегарадош бўлган шимолий вилоятларига Покистонниг "Теҳрик-e Толибон" (ТТП) ҳаркати аъзолари кўчириб олиб келингани хабар қилинмоқда.
Бу қарор ижтимоий тармоқларда кескин муҳокамаларга сабаб бўлди.
Маршал Абдурашид Дўстум ҳам Шимолий Афғонистонда Вазиристоннинг ташкил этилишига муносабат билдириб, “шаҳидлар қабристони”нинг босқинчилар оёғи остида қолишига йўл қўймаслигини айтиб ўтди.
Жумладан, Дўстум бошчилигидаги “Миллий жунбиш” партияси бу ҳаракатни “хорижийларнинг босқинчилиги” ва “Афғонистонни босиб олиш учун яна бир шармандали уриниш” деб атаган.
Шу билан бирга, “Миллий Жунбиш” партияси матбуот котиби Эҳсон Ниро “Дарё” мухбири билан суҳбатда Маршал Абдурашид Дўстум БМТга мактуб йўллаб, Покистон Толибон гуруҳи аъзоларига Афғонистон шимолига кўчиб ўтишга рухсат бермасликни сўраганини маълум қилди.
Акс ҳолда, ”Теҳрик-e Толибон” ҳаркати Марказий Осиё давлатларига хавф туғдириши мумкин, деб ҳисоблайди Эҳсон Ниро.
“Дарё” мухбири билан суҳбатда бўлган сиёсий масалалар бўйича эксперт Асадулла Надим ҳам “Толибон” ҳаракати ТТП аъзоларини Афғонистоннинг шимолий вилоятларига олиб келишини минтақа давлатларига стратегик таҳдид сифатида баҳолади.
Надимга кўра, бу этник сиёсат ҳисобланади, чунки “Толибон” аъзоларининг асосий қисмини пуштунлар ташкил қилади.
Кеча Тахор вилояти ўзбеклари Покистондан Афғонистонга келган пуштунлар билан Тахорда жанг қилган. Тахорнинг Хаважа Баҳоуддин вилоятидаги Ноабад Сежи қишлоғи аҳолиси “таёқ ва тошлар” билан Покистондан келган кўчманчилар билан тўқнашди.
Тожикистонга қўшни бўлган Тахор вилоятига “Теҳрик-e Толибон” аъзоларининг 300 нафар оиласи кўчиб бориши аввалроқ хабар қилинган эди.
"Толибон"га қарши бўлган Аҳмад Масъуд бошчилигидаги қаршилик фронти ҳам Тожикистон чегарасида Покистон “Толибон” ҳаракатининг борлиги хавотирли воқеа эканини айтиб ўтди.
Қаршилик кўрсатиш фронти ташқи алоқалар бўлими раҳбари Али Маисам Назарий Тожикистон билан чегарадош Тахорда Покистон "Толибон" ҳаракатининг мавжудлиги Тожикистон билан бирга бошқа Марказий Осиё давлатларининг ҳам хавфсизлиги ва суверенитетига бевосита таҳдид солиши ҳақида огоҳлантирди.
Аммо "Толибон" ҳаракати вазиристонлик қочқинларнинг Афғонистон шимолига кўчирилишини "жиддий масала деб ҳисобламаслиги"ни маълум қилди.
"Толибон" ҳукумати матбуот котиби Забиҳуллоҳ Мужоҳид Покистон билан чегара яқинида жойлашган Вазиристон вилоятидан (Покистон шимоли-ғарбида) келган муҳожирларнинг бир қисми “кўпроқ назорат қилиш мақсадида” Афғонистоннинг бошқа ҳудудларига кўчирилганини таъкидлади.
Изоҳ (0)