Афғонистон муваққат ҳукуматининг ташқи ишлар вазири Амирхон Муттақий “Толибон” ҳаракатига нисбатан жорий қилинган санксийлар бекор қилинса, АҚШ билан ҳамкорлик қилишга тайёрлигини билдирди. Бу ҳақда Ариана News хабар берди.
Муттақийнинг сўзларига кўра, Афғонистонда нафақат уруш тугади, балки мамлакат мустақил, қудратли, бирлашган, марказий ва масъулиятли ҳукумат томонидан бошқарилмоқда. У Афғонистон ва дунё давлатлари ўртасидаги яқинлашувни бошлаш имконияти пайдо бўлганини билдирди.
“Афғонистон халқаро ҳамжамиятнинг масъулиятли ва мустақил аъзоси сифатида кўтарилиши ва глобал тинчлик, хавфсизликни таъминлашда ўз масъулиятини адо этишга тайёр. Халқаро ҳамжамият, ўз навбатида, Афғонистонни ўз бағрига қабул қилиб, унинг мустақиллигига ҳурмат кўрсатиб, оёққа туришига ёрдам бериши керак. Бизнинг ташқи сиёсатимиз глобал ва минтақавий рақобатга аралашиб қолмаслик учун мувозанатли ва мустақил ёндашувга асосланади. Тенглик ва ҳурмат тамойилига асосланган умумий манфаатлар ва тинч-тотув яшаш имкониятларига интиламиз”, — деди у.
Муттақий мамлакатдаги инқирозни тан олди ва бунда АҚШ ва бошқа давлатлар томонидан киритилган санкцияларни сабаб қилиб кўрсатди.
“Давом этаётган иқтисодий инқирознинг асосий сабаби АҚШ томонидан санкциялар ва банк чекловларининг жорий этилишидир. Бу бизнинг гуманитар инқирозни ҳал қилиш бўйича ҳаракатларимизга тўсқинлик қилади. АҚШ урушдан вайрон бўлган давлатга қарши санкцияларни қўллаш учун қандай маънавий ва сиёсий асосларга эга бўлиши мумкин?”, — деди Муттақий.
Унинг қўшимча қилишича, сўнгги йигирма йил ичида Афғонистон иқтисодиёти “тўлиқ чет эл ёрдамига қарам бўлиб қолган” ва ҳозирда нол ёрдам билан “афғон халқининг асосий эҳтиёжларини қондириш” зарур.
У АҚШ ва бошқа мамлакатларга санкциялар ва босимлар келишмовчиликни бартараф этмаслигини қайд этди.
“Халқаро ҳамжамият Афғонистон Ислом Амирлиги суверенитети ва ҳудудий яхлитлигини ҳурмат қилган ҳолда у билан сиёсий ва иқтисодий алоқаларни ўрнатиши зарур”, — деди “Толибон” расмийси.
У агар санкциялар Афғонистонда яна бир ҳукуматнинг муваффақиясизлигига сабаб бўлса, бу нафақат мамлакат, балки бутун дунё учун оғир оқибатларга олиб келишидан огоҳлантирди.
“Бундай сценарий Афғонистон билан чекланиб қолмай, балки қўшниларимиз, минтақа ва дунё учун янги ва кутилмаган хавфсизлик, қочқинлар, иқтисодий, соғлиқ ва бошқа муаммоларни келтириб чиқарадиган буюк инсоний фожиа билан бирга келади”, — дейди у.
Изоҳ (0)