Бугун, 13 октябрь куни Ўзбекистон президенти Шавкат Мирзиёев Бишкекда ўтаётган МДҲ саммитида нуфузли Фахрий нишон билан мукофотланди.
Фахрий нишонни Шавкат Мирзиёевга Қирғизистон президенти Садир Жапаров топширди.
Мустақил давлатлар ҳамдўстлигининг Фахрий нишони —МДҲ Давлат раҳбарлари кенгашининг 2002 йил 7 октябрдаги қарори билан таъсис этилган бўлиб, минтақавий ҳамкорликни ривожлантиришга алоҳида ҳисса қўшган шахсларга берилади.
Шу пайтга қадар ушбу мукофот билан Россия президенти Владимир Путин, Озарбайжон собиқ президенти Ҳайдар Алиев, Украина собиқ президенти Леонид Кучма, Тожикистон президенти Имомали Раҳмон ва бошқалар тақдирланган.
Садир Жапаров Ўзбекистон президентининг дўстлик ва яхши қўшничилик муносабатларини мустаҳкамлаш, хавфсизлик ва барқарорликни таъминлаш, Марказий Осиё давлатлари ва бутун МДҲ мамлакатлари иқтисодиётини барқарор ривожлантиришга қаратилган саъй-ҳаракатларини юксак эътироф этди.
“Кўп жиҳатдан Шавкат Миромоновичнинг шахсий саъй-ҳаракатлари туфайли МДҲда янги ишонч муҳити яратилди, ўзаро савдо ва сармоя ҳажмининг ошишига хизмат қилувчи қулай муҳит шаклланмоқда.
Ўзбекистон Республикаси президенти дўстлик ва яхши қўшничилик муносабатларини мустаҳкамлаш, хавфсизлик ва барқарорликни таъминлаш, Марказий Осиё ва бутун МДҲ давлатларининг барқарор ижтимоий-иқтисодий ривожланишига беқиёс ҳисса қўшди”, — деди Садир Жапаров.
Изоҳ (0)