Россия президенти Владимир Путин Украинага юборилган Ғарб қуролларининг бир қисми ноқонуний қурол бозори орқали Яқин Шарққа ва “Толибон”га сотилаётганини айтганди. Афғонистон муваққат ҳукумати мазкур айбловни рад этди. Бу ҳақда ТОLOnews хабар берди.
“Толибон” матбуот котиби Забиҳуллоҳ Мужоҳид Россия президентининг даъвосини рад этди.
“Биз бу даъвони рад этамиз, у ҳақиқатга тўғри келмайди. Афғонистонга қуроллар олиб келинмайди ва бу ердан бошқа давлатга юборилмайди. Ғалабадан сўнг Ислом Амирлигига қолдирилган қурол ва жиҳозларнинг ҳаммаси хавфсиз”, — деди Мужоҳид.
Бироқ, айрим экспертларнинг фикрича, Россия президентининг мазкур баёноти юзасидан текширув ўтказилиши керак.
“Бу масала қўшимча текширувга муҳтож, қачонки бизда ҳужжатлар бўлса, бу масала бўйича изоҳ беришимиз мумкин. Аммо Украинадаги ғарб қуроллари турли харидорларга кенг миқёсда сотилаётгани аниқ”, — деди ТОLOnews телеканалига ҳарбий таҳлилчи Асадулла Надим.
“Украинанинг Афғонистон билан чегараси ҳам, яхши муносабатлари ҳам йўқ. Шундай қилиб, бундай воқеа содир бўлганда, ягона йўл Россиядан Марказий Осиё давлатлари орқали, кейин эса Афғонистонга боришдир”, — деди яна бир ҳарбий таҳлилчи Сарвар Ниёзий.
Изоҳ (0)