Россиянинг постсовет ҳудудидаги давлатлар билан ҳудудий баҳслари йўқ. Бу ҳақда Россия Хавфсизлик кенгаши раиси ўринбосари Дмитрий Медведевга таяниб, “ТАСС” хабар берди.
Медведев “Билим” марафонида “Географик ва стратегик чегаралар” мавзусида маъруза ўқиди.
“Яқин хориж” тушунчаси шунчаки сўз эмас, балки моҳиятнинг аксидир. Мен шуни алоҳида айтмоқчиман: бу камарга кирадиган давлатлар билан бизнинг ҳудудий баҳсларимиз йўқ”, — деди у.
Шунингдек, Россия Хавфсизлик кенгаши раиси ўринбосари “Украина Россия эмас” деган тушунча абадий йўқолиши кераклигини айтди.
“Бир пайтлар Украинанинг собиқ раҳбарларидан бири Украина Россия эмас, деган эди. Бу тушунча абадий йўқолиши керак. Украина, шубҳасиз, Россиядир. Украина ва унинг аҳолисини ҳақли равишда умум рус цивилизациясининг бир қисми деб биладиган Россия жамоатчилик фикрини эътиборсиз қолдиришга уринишлар ҳам унутилиши керак”, — деди Медведев.
У Днепрнинг иккала қирғоғидаги ҳудудлар Россиянинг стратегик ва тарихий чегаралари “таркибига кириши”ни айтди.
“Бизнинг барча рақибларимиз оддий ҳақиқатни қатъий ва абадий тушуниши керак: Днепрнинг иккала қирғоғидаги ҳудудлар Россиянинг стратегик, тарихий чегараларининг ажралмас қисмидир, шунинг учун уларни мажбуран ўзгартиришга, уларни бўлиб ташлашга бўлган барча уринишлар барбод бўлади”, — деди Россия Хавфсизлик кенгаши раиси ўринбосари.
У Путиннинг Россия чегаралари “ҳеч қаерда тугамайди” деган сўзларини такрорлади.
“Президент бизнинг чегараларимиз ҳақида аниқ ва лўнда гапирган: Россия чегаралари ҳеч қаерда тугамайди. Бу жуда яхши сўзлар”, — деди у.
Изоҳ (0)