Афғонистоннинг сув ресурслари бўйича мутахассиси Нажибуллоҳ Садид сунъий йўлдошдан олинган суратларни кўрсатди. Ундан маълум бўлишича, июль ойи бошида Амударё суви Қўштепа каналининг сув олинадиган дамбасидан ошиб ўтган ва дамбанинг айрим қисмларини (200 метргача) ювиб кетган.
Илгари Садид канални қуриш лойиҳаси тўғри ишлаб чиқилганига шубҳа билдирганди. Бундан ташқари, “Толибон”нинг Амударё қирғоқларидаги эрозияга қарши кураш чоралари ҳам самарасиз кечган.
Маълумот учун, “Толибон” Амударёнинг Балх қисмида Қўштепа каналини қурмоқда, канал сувининг Афғонистон шимолидаги ҳудудларга йўналтирилиши Туркманистон ва Ўзбекистоннинг айрим вилоятларида сув тақчиллигига олиб келиши мумкин.
The Economist прогнозига кўра, агар канал қуриб битказилса, минтақавий можаронинг кучайишига олиб келиши мумкин. Канал Амударё сувини Ўзбекистон билан чегарага йўналтиради. Афғонистон электр энергиясининг катта қисмини Ўзбекистондан импорт қилиши ҳисобга олинса, “Толибон” қўшни республикага қарши чиқолмайди.
“Иқлим ўзгариши Ўзбекистонни 15 фоиз сув йўқотишига сабаб бўлмоқда, агар канал қурилиши ортидан яна 10 фоиз йўқотилса, Ўзбекистон 25 фоиз сув йўқотиши мумкин”, — дейилади яна бир прогнозда.
Афғонистон ҳукуматининг бош вазири Абдул Ғани Бародар март ойида Қўштепа канали қўшни давлатларнинг сувдан фойдаланиш ҳуқуқларини бузмаслигини таъкидлади. У Амударё сувидан фойдаланиш нуқтаи назаридан Афғонистон шимолий қўшниларга йўналтирилган сув ҳажмларига даъво қилмасдан, ўз ҳуқуқлари доирасида қолишини айтди.
Изоҳ (0)