“Толибон” Афғонистон собиқ ҳукумати қулаганидан сўнг қўшни давлатлар, жумладан, Ўзбекистонга олиб ўтилган ҳарбий вертолётларни қайтариш бўйича расмий чоралар кўрилганини маълум қилди.
“Толибон” Мудофаа вазирлигининг режалаштириш ва сиёсат вазири ўринбосари Муҳаммад Қосим Фарсид вазирликнинг йиллик ҳисоботида айтишича, Афғонистонга қўшни давлатларга топширилган 60 га яқин вертолёт ва ҳарбий самолётларни қайтариш бўйича расмий чора кўрилди.
“Толибон” расмийси айнан қандай чоралар ҳақида гап кетаётганини ошкор қилмади.
Фарсид собиқ ҳукумат қулагандан кейин, Америка босими туфайли вертолётлар “Толибон”га топширилмаётганини даъво қилди.
Афғонистоннинг Ўзбекистондаги авиатехникалари
2021 йил август ойида “Толибон” Кобулни эгаллаб, ўша пайтдаги президент Ашраф Ғани мамлакатдан кетганида афғон ҳарбийлари самолёт ва вертолётда Ўзбекистонга қочиб ўтган. Ўзбекистон президентининг Афғонистон бўйича махсус вакили Исматилла Эргашев Ўзбекистонга собиқ афғон учувчилари томонидан олиб ўтилган самолёт ва вертолётлар “Толибон” ҳаракатига қайтарилмаслигини таъкидлаган.
Эргашевнинг сўзларига кўра, авиатехникаларни АҚШ ҳукумати сотиб олиб берган ва Афғонистон собиқ ҳукуматига вақтинчалик фойдаланиш учун топширган. Собиқ ҳукумат бу учоқларга бир доллар ҳам сарфламаган.
Сиёсатчи афғон самолётлари Ўзбекистонга кирган пайт чегарада бўлиб, воқеанинг бевосита иштирокчисига айланганини айтди. Расмий жараён Ўзбекистон суди ҳукмига биноан қарор қилиниши, лекин воситаларни олиб кетиш Америка ихтиёрида эканини таъкидлади.
Статистик маълумотларга кўра, Афғонистон ҳукумати ўзгариши даврида Тожикистон ва Ўзбекистонга аввалги ҳукуматнинг 60 дан ортиқ ҳарбий вертолётлари олиб ўтилган.
2023 йил бошида маршал Абдурашид Дўстум ушбу авиатехникаларни Афғонистон қаршилик фронтига топширишга чақирганди.
Изоҳ (0)