Россия ТИВ Арманистонни Рим статутига қўшилишини қоралаб, “ўта салбий” оқибатлардан огоҳлантирди
Арманистоннинг Халқаро жиноий суднинг Рим статутига қўшилиш режаларини мутлақо қабул қилиб бўлмайди. Бу ҳақда Россия Ташқи ишлар вазирлигидаги манбаларга таяниб, “ТАСС” хабар берди.
“Россия Арманистоннинг Халқаро жиноий суднинг (ХЖС) Рим статутига қўшилиш режасини ХЖСнинг яқинда Россия президентига қарши ноқонуний ва асоссиз ‘ордер’лари фонида мутлақо номақбул деб ҳисоблайди”, — дейилади муносабатда.
Россия Арманистонни Рим статутига қўшилган тақдирда икки томонлама муносабатларда “ўта салбий” оқибатларга дуч келишидан огоҳлантирилган.
17 март куни Халқаро жиноий суд Россия президенти Владимир Путинни Украинадаги ҳарбий жиноятларда айбланиб, ҳибсга олишга ордер берди. Агар Ереван Рим статутини ратификация қилса, у ҳолда мамлакат расмийлари Путин Арманистонга ташриф буюрган тақдирда уни ҳибсга олишга мажбур бўлади.
24 март куни Арманистон Конституциявий суди Рим статути мамлакат асосий қонунига зид эмаслиги ҳақидаги қарорини эълон қилди. Эндиликда Арманистон ҳукумати Рим статутини ратификация қилиш учун парламентга тақдим этиши мумкин.
Арманистон Озарбайжонни Тоғли Қорабоғ бўйича икки томонлама можаро пайтида содир этилган “жиноятлар” учун жавобгарликка тортиш мақсадида 2022 йил охирида Рим статутини тан олиш учун Конституциявий судга мурожаат қилган. Статут 1998 йилда имзоланган, аммо Арманистон ҳозиргача уни ратификация қилмаган, чунки 2004 йилда Конституциявий суд шартнома мажбуриятларини ўша пайтда амалда бўлган мамлакат конституциясининг бир қатор қоидаларига зид деб тан олган.
