Жорий йил 2 август куни Озарбайжонда Миллий кино куни нишонланди. Шу муносабат билан сўнгги йилларда суратга олинган 5 та яхши рейтингга эга Озарбажон фильмларини ёдга олдик.
“Апория: қиёмат тажрибаси” (2022)
Ушбу асар қўрқинчли жанрда суратга олинган камёб озарбайжон фильмларидан биридир. Сюжетга кўра номаълум босқинчилар бир қишлоқни эгаллаб олишади ва олимлар билан биргаликда одамлар устида даҳшатли тажрибалар ўтказади. Тадқиқот муваффақиятсиз тугаганидан сўнг, жиноятчилар омон қолганларни тоғларда отиб ташлайди, аммо тажрибада иштирок этган икки шахс улардан қутулиб қолади: Арвин ва Ежла тоғ ёнбағирларидаги ғорлардан бирида яшириниб олади. Тез орада ёмғир туфайли ҳалок бўлганларнинг жасади мутацияга учрайди ва зомбиларга айланади.
“Мавсум охири” (2019)
Баъзида қон-қариндошлар ҳам бир том остида яшай олмайди. Маҳмуд исмли ўғил, Фидан она ва Замир ота бир-бирларидан нафратланади, уларнинг ҳаёти тартибсизлик ва тугамас жанжаллардан иборат. Аммо соҳилга оилавий саёҳат қилгандан сўнг барчаси ўзгариб кетади: Фидан она тасодифан сувга ғарқ бўлади ва ота-бола уни топа олмайди. Онанинг ғойиб бўлиши Маҳмуд ва Замирнинг тақдирини ўзгартиради. Эндиликда улар ўз ҳаётини оқ қоғоздан бошлаши керак.
“Ўлимдан ўлимгача” (2020)
Мазкур фильм 2020 йилда Венеция кинофестивали танловида иштирок этган. Давиднинг ҳаёти чексиз қочишлардан иборат. У қаллиғи ҳақида ёмон сўзлар айтган гиёҳванд моддалар сотувчисини жаҳл устида ўлдириб қўяди. Шу сабабли Давид унинг мафиясидан яширинишга уринади. Бу вақт давомида қаҳрамон турли одамлар билан учрашади ва ҳар бир инсонга оз бўлса-да, ёрдам бериш орқали айбини ювишга ҳаракат қилади.
“Балиқларга хутба” (2022)
Довуд урушдан қайтганда у яшаган қишлоқнинг деярли барча аҳолиси ғайриоддий касалликдан вафот этганининг гувоҳи бўлади. Фақатгина Довуднинг синглиси тирик қолади. У синглисини бу ерлардан кетишга кўндиришга узоқ ҳаракат қилади, аммо қиз ўлишини билса-да, ўз қишлоғида қолишни истайди.
“Хурмолар етилганда” (2019)
Ҳужжатли фильм дунёнинг нуфузли IDFА номли бадиий фильмлар фестивалида намойиш этилди. Озарбайжон қишлоқларининг бирида бир кекса аёл яшайди, у доимо икки ўғли ва қўшниларининг болалари боғдаги хурмоларни териб кетишларини кутади. Аммо қария оила аъзолари яна бир йил давомида бир-бирларини кўрмасликларига тўғри келади.
Изоҳ (0)