Арманистон Владимир Путин мамлакатга ташриф буюрса, уни Халқаро жиноий судга топширишни режалаштирмаяпти. Бу ҳақда Арманистон парламенти вице-спикери Акоп Аршакян Armenpress агентлигига берган интервьюсида маълум қилди.
Халқаро жиноий суд (ХЖС) 17 март куни Путинни ҳибсга олиш учун ордер берган. Арманистон 24 март куни Конституциявий суди ХЖСнинг Рим статутида мустаҳкамланган мажбуриятларни мамлакатнинг асосий қонунчилигига мувофиқ деб тан олди. Кремл бу қарорга дарҳол муносабат билдирди ва буни “қабул қилиб бўлмаслигини” таъкидлаб, “ўта салбий оқибатлар”дан огоҳлантирди.
Шундан сўнг, Аршакян Арманистон Россия хавотирларига қулоқ тутганини ва Рим статути Москва билан муносабатларни бузмаслигига ишонч ҳосил қилиши мумкинлигини айтди.
“Арманистон Конституциявий суднинг қарори ҳеч кимни ҳеч қандай масалада айбдор деб ҳисобламайди ва ҳеч кимни ҳибсга олиш чораларини талаб қилмайди”, — дейди у.
Бундан ташқари, вице-спикер яқинда бошқа давлат билан имзоланган шартнома ҳақида гапирди, унга кўра Рим статути икки томонлама муносабатларга таъсир қилмаслиги керак. У бу қайси давлат эканига аниқлик киритмаган.
“Бундай келишув Россия билан ҳам бўлиши мумкин, бу вариантлардан бири холос. Бир нарса аниқ: биз Россия томонидан билдирилган хавотирларни эшитдик”, — деди Аршакян.
Сиёсатчига кўра, Рим статутининг ратификация қилиниши Арманистонга Озарбайжон ҳарбийларини Тоғли Қорабоғдаги қуролли можаро пайтидаги жиноятлар учун жавобгарликка тортиш воситаларини беради.
Путин Арманистонга ташриф буюрса, ҳибсга олиниши мумкин
Арманистон Конституциявий судининг қарори Халқаро жиноий суднинг (ХЖС) тергов палатаси Путинни, шунингдек, Россиядаги болалар ҳуқуқлари бўйича комиссар Мария Лвова-Беловани ҳибсга олишга ордер берганидан бир ҳафта ўтиб маълум бўлди. Улар ҳарбий жиноятларда, хусусан, Украинанинг босиб олинган ҳудудларидан болаларни Россияга мажбуран депортация қилишда гумон қилинмоқда.
Москва 2022 йил 24 февралда Россия ҳарбийларининг Украинага ҳужуми ортидан Украинада содир этилган ҳарбий жиноятларга алоқадорлигини рад этади. Россия ХЖСнинг юрисдикциясини тан олмайди ва унинг ишида иштирок этмайди. 2016 йилдан бери у суднинг ҳаракатларини белгилайдиган Рим статутининг иштирокчиси эмас.
Ўз навбатида, ХЖС ҳарбий жиноятларни тергов қилиш ва жазолашда давлат раҳбарларининг дахлсизлигини тан олмайди. Путин ХЖС ордерига асосан Рим статутини ратификация қилган 123 та мамлакатларга энди кира олмайди, улар орасида Тожикистон ҳам бор.
Изоҳ (0)