Озарбайжон чегарачилари Арманистон ҳудудига киришга уринган россиялик миллиардер ва таниқли инвестор, тан олинмаган Тоғли Қорабоғ республикаси “ҳукумати” раҳбари бўлган Рубен Варданянни қўлга олди. Бу ҳақда Озарбайжон Давлат чегара хизмати хабар берди.
“Лочин назорат-ўтказиш пунктида мамлакатда ноқонуний бўлган, тан олинмаган тоғли Қорабоғ республикасида давлат вазири лавозимида ишлаган 1968 йилда туғилган Рубен Варданян тезкор ҳаракат кучлари аъзолари ҳамроҳлигида қўлга олиниб, Бокуга олиб кетилди”, — дейилади хабарда.
Кремль Қорабоғдан чиқиб кетмоқчи бўлган тадбиркор Рубен Варданяннинг ҳибсга олингани ҳақида маълумотга эга эмаслигини айтди.
“Менда бундай маълумот йўқ. Шунинг учун бу ҳақда ҳеч нарса дея олмайман”, — деган Кремль матбуот котиби Дмитрий Песков.
Шунингдек, у Варданяннинг Россия фуқароси бўлиб қолиш-қолмаслигига аниқлик киритишга қийналди.
“У Россия фуқаролигидан воз кечишига ишончим комил эмас, шунинг учун бу ҳақда аниқ изоҳ беришга журъат этмайман, лекин у Россия фуқаролигига эга бўлган. Аммо агар фуқароликдан воз кечган бўлса, бу бошқа масала”, — деди у.
- Ўтган август ойида россиялик миллиардер ва тадбиркор Варданян Россия фуқаролигидан воз кечиб, Арманистон паспорти билан Тоғли Қорабоғга кўчиб ўтаётганини маълум қилганди. Кейинчалик у тан олинмаган Тоғли Қорабоғ республикаси давлат вазири (ҳукумат раҳбари) лавозимини эгаллади. Қорабоғни Арманистон билан боғловчи Лочин йўлаги блокадаси бошланганидан кейин у ўз лавозимидан озод этилди. Шу пайтгача Варданян Тоғли Қорабоғда бўлган.
Изоҳ (0)