Қорабоғда 20 август куни ўтишма оқибатида олти нафар россиялик тинчликпарвар аскар ҳалок бўлган. Бу ҳақда Озарбайжон Бош прокуратурасига таяниб, “Репорт.аз” хабар берди.
Хабарда айтилишича, 20 сентябрь куни Жанятоғ қишлоғида “антитеррор тадбирлари”да иштирок этаётган Озарбайжон ҳарбийлари ичида Россия тинчликпарвар кучлари бўлган машинага қарата ўқ узган. Бош прокуратуранинг даъво қилишича, улар “оғир релеф ҳамда туманли ва ёмғирли об-ҳаво шароити” туфайли автомобилни “ноқонуний арман қуролли гуруҳларига тегишли” деб ўйлаб “янглишган”.
Идора, шунингдек, Россия тинчликпарвар кучларига тегишли яна бир автомашина ўққа тутилгани ҳақида хабар берди. Бу воқеа ҳам 20 сентябрь куни Жанятоғ ҳудудида содир бўлган. Оқибатда бир россиялик ҳарбий ҳалок бўлган, яна бири яраланган. Озарбайжон Бош прокуратураси уларнинг ўққа тутилиши “Арманистон қуролли тузилмаларининг номаълум аъзолари” томонидан амалга оширилганини маълум қилди.
Хабарда айтилишича, ҳар икки факт бўйича жиноий иш қўзғатилиб, Озарбайжон Бош прокуратураси ҳузуридаги Тергов департаменти томонидан тергов ҳаракатлари олиб борилмоқда.
Россия Telegram-каналлари Россия тинчликпарвар кучларининг ўққа тутилган машинаси акс этган суратларни тарқатди.
Қорабоғда Россия ҳарбийларининг ўлими учун Алиев Путиндан узр сўради
Россия Мудофаа вазирлиги 20 сентябрь оқшомида Қорабоғда россиялик тинчликпарвар кучлари ҳалок бўлганини маълум қилди. Вазирликнинг таъкидлашича, ҳарбийлар бўлган автомобиль “Жанятоғ қишлоғи ҳудудидаги Россия тинчликпарвар контингентининг кузатув постидан қайтаётганда” ўққа тутилган. Вазирлик машинада қанча аскар бўлгани ва ким ўқ узганига аниқлик киритмади. Шу билан бирга, идора фақат битта автомобиль отишма остида қолганини хабар қилди. Қурбонлар орасида Россиянинг Қорабоғдаги тинчликпарвар контингенти қўмондони ўринбосари Иван Ковган ҳам борлиги маълум бўлди.
“РИА Новости”, “Интерфакс” ва “ТАСС” нашрлари Россия ҳуқуқ-тартибот идораларидаги манбага таяниб, Қорабоғда россиялик ҳарбийларни ўлдиришда гумон қилинган биринчи шахслар қўлга олингани ҳақида хабар берди.
Манбанинг айтишича, ушбу қотилликда қўл остидагилари айбдор бўлган Озарбайжон Қуролли кучлари корпуси қўмондони ўз вазифасидан четлаштирилган. Озарбайжон томони бу маълумотни ҳали тасдиқламади.
21 сентябрь куни Озарбайжон президенти Илҳом Алиев Владимир Путин билан телефон суҳбатида “Қорабоғда Россия тинчликпарвар қўшинларининг фожиали ўлими муносабати билан узр сўради ва чуқур ҳамдардлик билдирди”.
Изоҳ (0)