Арманистон Озарбайжон устидан Бирлашган Миллатлар Ташкилоти Халқаро судига даъво аризасини берди. Қорабоғдаги вазият туфайли Ереван Бокуни ирқий дискриминациянинг барча шаклларига барҳам бериш тўғрисидаги халқаро конвенция ни бузганликда айбламоқда.
Арманистон Озарбайжондан ҳаммага Қорабоғни тарк этиш имкониятини беришни, шунингдек, БМТ ва Қизил Хоч ходимларининг минтақадаги арман аҳолиси билан учрашишини таъминлашни, ҳудуднинг коммунал тизимини тиклашни ва тугатилган Тоғли Қорабоғ Республикасининг фуқаролик ҳолати актларини ҳақиқий деб тан олишни талаб қилмоқда.
Арманистон, шунингдек, Озарбайжон ҳарбийларини Қорабоғдаги тинч аҳоли пунктларидан олиб чиқиб кетишни ва минтақадаги арман ёдгорликларини бузишни тақиқлашни талаб қилмоқда.
Даъво аризасига кўра, Озарбайжон БМТга талабларни бажариш чоралари тўғрисида ариза тақдим этилганидан кейин бир ой ичида, сўнгра якуний қарор қабул қилингунга қадар ҳар уч ойда ҳисобот бериши кутилмоқда.
Озарбайжон 19—20-сентябр кунлари “аксилтеррор чоралари” натижасида Қорабоғ ҳудуди устидан назоратни тўлиқ тиклади. 1990 йилларнинг бошидан бери мавжуд бўлган тан олинмаган Тоғли Қорабоғ Республикасининг ҳокимияти ўз-ўзини тарқатиб юборди.
Икки ҳафтадан камроқ вақт ичида у ерда яшовчи 120 минг этник армандан 100 минги Қорабоғни тарк этди.
Изоҳ (0)