Эрон энергетика вазири Аббос Алиободий Россия энергетика ҳафталиги доирасида ўтказилган BRICS энергетика вазирлари йиғилишида Россия, БАА ва Саудия Арабистони электр тармоқларини Эрон орқали бирлаштиришни таклиф қилди.
Алиободийнинг қайд этишича, Эрон ўз тармоғини қуруқликдаги чегараси бўлган барча давлатлар билан боғлаб, электр транзитини ривожлантириш ниятида. Унга кўра, Эрон, Россия, БАА ва Саудия Арабистони электр тармоқларини бирлаштириш ишлаб чиқариш соҳасига сармояларни қисқартириш, атроф-муҳитни яхшилаш ва минтақавий даражада хавфсизликни ошириш имконини беради.
2024 йил июнь ойида Эроннинг собиқ энергетика вазири Али Акбар Меҳрабиян Шанхай ҳамкорлик ташкилотига (ШҲТ) аъзо давлатлар ўртасида минтақавий электр энергияси бозорини яратишни таклиф қилган. Бу электр тармоқларининг барқарорлиги ва самарадорлигини оширади. Унинг сўзларига кўра, уни ШҲТнинг бошқа аъзолари ҳам қўллаб-қувватлаган. Шу муносабат билан Меҳрабиян энергетика марказининг келажагини баҳолаш учун ишчи гуруҳ тузишга чақирган.
Изоҳ (0)