Сурия жиддий қадрсизланган миллий валютага ишончни тиклаш мақсадида янги банкноталар чиқариб, улардан иккита нолни олиб ташламоқчи. Бу ҳақда Reuters хабар берди.
Бу қадам 14 йил давом этган уруш ва 2024 йил декабрида президент Башар Асад ағдарилишидан кейин рекорд даражада қадрсизланган Сурия фунтини кучайтиришга қаратилган. 2011 йилда уруш бошлангач, Сурия фунти ўз қийматининг 99 фоизидан кўпроғини йўқотди. Ҳозирги курс бир АҚШ долларига қарийб 10 минг фунтни ташкил этмоқда. Урушдан аввал эса бу кўрсаткич 50 фунт атрофида эди.
Қадрсизланиш кундалик савдо ва пул ўтказмаларини тобора мушкул қилмоқда. Ҳозир одамлар бир ҳафталик озиқ-овқат харидларини қора пакетларда, камида ярим кило келадиган 5 минг фунтлик купюралар билан амалга оширишга мажбур — бу энг йирик номиналлик банкнота ҳисобланади.
Транзакцияларни енгиллаштириш мақсадида Сурия Марказий банки август ойида хусусий банкларга “иккита нолни олиб ташлаш” орқали янги валюта чиқаришни режалаётганини билдирган.
Reuters’га кўра, бешта тижорат банкири, Марказий банкнинг бир манбаси ва суриялик иқтисодий амалдор бу маълумотни тасдиқлаган. Бироқ қарор расман эълон қилинмагани сабабли улар аноним қолишни сўраган.
Фунтни қайта баҳолаш учун қонунчилик тасдиғи талаб этиладими-йўқми, ҳозирча номаълум. Сурия сентябрь ойида янги қонунчилик ассамблеясини шакллантириш учун илк сайловларни ўтказиши кутилмоқда.
Хабарларга кўра, Сурия Россиянинг давлатга қарашли “Гознак” пул босмахонаси билан янги банкнотларни чоп этиш бўйича келишувга эришган. Июль охирида Суриянинг юқори мартабали делегацияси Москвага ташриф буюрганида шартнома якунланган. Асад даврида ҳам Сурия валютасини чоп этган “Гознак” хабарга изоҳ беришдан бош тортган.
Изоҳ (0)