Украина баллистик ракеталарнинг Россияга берилиши эҳтимоли туфайли Эронга мурожаат қилди. Теҳрон икки томонлама муносабатлар учун “ҳалокатли оқибатлар” ҳақида огоҳлантирилди.
Украина ТИВ халқаро ОАВларда Эрон томонидан Россияга баллистик ракеталарни топшириш эҳтимоли ҳақидаги хабарлардан хавотирда эканини қайд этган.
Биз яна бир бор Эрон Ислом Республикаси раҳбариятини БМТ низоми ва халқаро ҳуқуққа кўра босқинчи давлат ҳисобланган Россияга ҳар қандай турдаги қурол ва ҳарбий техникани бермасликка чақирамиз, дейилади баёнотда.
Вазирлик Россия ва Эрон ўртасидаги ҳарбий-техник ҳамкорликнинг чуқурлашиши нафақат Украина, балки бутун Европа, Яқин Шарқ ва дунё учун хавфсизликка жиддий таҳдид солаётганини таъкидлаган.
Биз халқаро ҳамжамиятни халқаро тинчлик ва хавфсизликни ҳимоя қилиш учун Теҳрон ва Москвага босимни кучайтиришга чақирамиз, дея қўшимча қилган Украина ТИВ.
Украина Эронни Россияга қурол-яроғ етказиб беришни бутунлай тўхтатишга ва “ўз сиёсий раҳбариятининг Россия ҳарбий ўлим машинасини ёқишда иштирок этмаслик ҳақидаги баёнотларининг самимийлигини” исботлашга чақирган.
Биз расман Теҳронни огоҳлантирамизки, агар Эрон Россияга баллистик ракеталарни топширгани тасдиқланса, бу Украина-Эрон икки томонлама муносабатлари учун ҳалокатли оқибатларга олиб келади, дея хулоса қилган вазирлик.
Аввалроқ The Wall Street Journal нашри Эрон Россияга баллистик ракеталарнинг янги партиясини, эҳтимол, қисқа масофага учувчи ракеталарни топширгани ҳақида хабар берган эди. Урушни ўрганиш институти (ISW) таҳлилчиларига кўра, бу қадам Россия ва Эрон ўртасидаги муносабатларни чуқурлаштириш режасининг фақат бир қисмидир. Берилган ракеталар эвазига Теҳрон Москвадан Су-35 қирувчи самолётларини олмоқчи.
Изоҳ (0)