Эрондаги ҳарбий заводларга уюштирилган дронлар ҳужумида Исроил эмас, АҚШ ва яна бир давлат айбдор — ОАВ 

Эроннинг Исфаҳон шаҳридаги ҳарбий объектга уюштирилган дронлар ҳужумида АҚШ ҳарбий-ҳаво кучлари ва яна бир давлат айбдор, Исроилнинг ҳужумга алоқаси йўқ. Бу ҳақда АҚШдаги манбаларга таяниб, Al-Hadath хабар берди.

Маълум қилинишича, ҳужумда Эроннинг баллистик ракеталар омборхонаси нишонга олинган. Мазкур операция Эрон ва Россияга “заводлар ташкил этиш ва баллистик қуролларни экспорт қилишга йўл қўймаслик” ҳақида сигнал юборгани таъкидланади.

Аl-Arabia манбаларга таяниб, АҚШ Ҳарбий-ҳаво кучлари ва “яна бир давлат” Эрондаги ҳарбий заводга дронлар ёрдамида ҳужум қилганини хабар қилган. Al-Hadath телеканали Исроилнинг ҳужумга алоқаси йўқлигини қайд этмоқда.

IRNA агентлигининг хабар беришича, Эрон ҳукумати дрон ҳужуми юзасидан текширув бошлаган. Эрон парламенти Миллий хавфсизлик комиссиясининг уч нафар аъзоси портлаш содир бўлган жойга ташриф буюришни режалаштирмоқда. Авиаҳужум оқибатида ҳеч ким жабрланмагани таъкидланмоқда.

Эслатиб ўтамиз, Эрондаги ишлаб чиқариш объектларидан бирига 29 январга ўтар кечаси дронлар ҳужум қилган. Аl-Arabia телеканалининг ёзишича, Исроил Эрон ҳарбий саноатини йўқ қилиш учун ушбу мамлакат ҳудудида махсус ҳарбий амалиёт бошлаган. Исроил томони бу хабар юзасидан муносабат билдирмаган.