Россия Исроилнинг Дамашқдаги Эрон консуллигига уюштирган ҳужумига халқаро ҳамжамият тегишли ҳуқуқий баҳо бериши кераклигини айтиб, бундай тажовузкор ҳаракатларга чек қўйиши лозим, деган фикрни билдирди. Бу ҳақда Россия ТИВ баёнотига таяниб, “ТАСС” хабар берди.
Исроилнинг бундай тажовузкор хатти-ҳаракатларига мутлақо йўл қўйиб бўлмайди ва тўхтатилиши керак, деб ҳисоблаймиз. Биз халқаро ҳамжамиятнинг барча масъул аъзолари бу ҳаракатларга тегишли ҳуқуқий баҳо беришини зарур, деб ҳисоблаймиз. Биз Исроил раҳбариятини бутун минтақада ўта хавфли оқибатларга олиб келадиган провокацион ҳарбий ҳаракатлардан воз кечишга қатъий чақирамиз, — дейилади вазирлик баёнотида.
Россия ТИВга кўра, ҳужум натижасида бино бутунлай вайрон бўлган, ҳалок бўлганлар ва яраланганлар орасида дипломатлар ҳам бор. Москва Эроннинг Суриядаги консуллик ваколатхонасига қилинган ҳужумни кескин қоралайди.
Вазирлик тегишли Вена конвенциялари билан дахлсизлиги кафолатланган дипломатик ва консуллик муассасаларига қилинган ҳар қандай ҳужумни мутлақо қабул қилиб бўлмас деб ҳисоблашини айтган. Шунингдек, баёнотда ҳужумнинг аҳоли зич жойлашган ҳудудда амалга оширилгани, бу эса тинч аҳоли орасида оммавий қурбонларнинг юқори хавфини келтириб чиқаришига урғу берилган.
Изоҳ (0)