Эрон ҳукумати Украинадаги урушда ишлатиш учун Россияга катта партия ўқ-дориларни яширинча етказиб берган ва бу таъминотни давом эттиришни режалаштирмоқда, деб ёзади Sky News куч тузилмаларидаги аноним манбага таяниб.
Телеканал суҳбатдошининг даъво қилишича, 10 январь куни Россия байроғи остидаги “Муса Жалил” ва “Бегей” юк кемалари Эрон портидан қурол-яроғ ортилган 200 га яқин транспорт контейнерлари билан жўнаб кетган. 12 январь куни кемалар Туркманистон портларидан бирига кириб, кейин Каспий денгизини кесиб ўтган, 27 январь куни Астрахан портига етиб борган, деди манба.
Унинг сўзларига кўра, контейнерларда 100 миллионга яқин турли ўлчамдаги патронлар, шунингдек, ракета ва артиллерия қурилмалари, гранатомётлар, миномётлар ва пулемётлар учун 300 мингга яқин снарядлар ташилган. Бундан ташқари, бортда 10 000 га яқин зирҳли нимча ва каскалар бўлган.
Таъкидланишича, Москва Теҳронга ўқ-дори етказиб бериш учун нақд пул тўлаган.
Манба Россияга етказилган ўқ-дорилар миқдори ҳақида айтганларига ишончи комил эканини билдирди. Бироқ телеканал буни мустақил равишда текшириб, тасдиқлай олмаслигини қайд этмоқда. Sky News интервью олган экспертлардан бири ўқ-дорилар сони унга жуда кўпдек туюлганини айтди.
Россия урушда Эрон қуролларидан фойдаланмоқда
Россия Украинадаги урушда Эрон қуролларидан фаол фойдаланмоқда. 2022 йил кузидан бошлаб Россия Мудофаа вазирлиги Украинадаги ҳарбий ва энергетика объектларига ҳужум қилиш учун Эронда ишлаб чиқарилган Shahed-131/136 камикадзе-дронларидан фойдаланмоқда, рус ҳарбийлари уларнинг номини “Геран-1” ва “Геран-2” деб ўзгартиради.
2023 йилнинг февралида The Guardian газетаси Эрон Россияга қайта фойдаланиш мумкин бўлган узоқ масофали ҳужумчи дронлар партиясини топширганини ёзганди. Ғарб оммавий ахборот воситалари Россия ва Эрон расмийлари Россия ҳудудида дронларни ишлаб чиқарувчи завод қуриш имконияти бўйича келишиб олгани ҳақида бир неча бор ёзган.
Шунингдек, Эрон Россияга учиш масофаси мос равишда 300 ва 700 километрни ташкил этувчи “Фатеҳ-110” ва “Зулфиқор” баллистик ракеталарини етказиб бермоқчилиги хабар қилинган.
Изоҳ (0)