Россия разведкаси Эронга Ғарбга ядровий дастур ҳақида махфий маълумотларни узатаётган Британия агентини топишга ёрдам берган. Январь ойида у қатл қилинди, деб ёзади The New York Times.
2023 йилнинг январь ойида Эрон 2000-2008 йилларда Эрон мудофаа вазири ўринбосари бўлиб ишлаган ва мамлакатнинг бир қанча юқори даражадаги мулозимларининг маслаҳатчиси бўлган Али-Ризо Акбарий қатл этилганини эълон қилди. 2019 йилда у Эрон ҳукумати томонидан ҳибсга олинган ва жосусликда айбланган.
Эрон расмийларининг даъво қилишича, Акбарий Британия разведка хизмати томонидан ёлланган ва 2004 йилдан бери Ғарбга Эрон ядро дастури ҳақида муҳим маълумотларни узатган. NYT маълумотларига кўра, айнан Акбарий Ғарбга мамлакатнинг бойитилган уран ишлаб чиқариш бўйича асосий маркази бўлган Эрондаги Фордо ерости мажмуасининг асл мақсадини очиб берган.
2008 йилда Акбарий истеъфога чиққан ва Буюк Британияга кўчиб ўтиб, 2012 йилда у ерда фуқароликни қабул қилган. 2019 йилда Акбарий Эронга таклиф қилинган, бироқ етиб келганида ҳибсга олинган.
“Эрон ҳукумати Акбарий Фордо ҳақидаги маълумотлар сиздирилишининг манбаси эканини аниқлади. Ислом инқилоби гвардияси корпусига алоқадор бўлган икки эронликнинг сўзларига кўра, бу маълумот Россия разведкаси томонидан тасдиқланган. Эроннинг яқин иттифоқчиси бўлган Россия қандай қилиб бу маълумотга эга бўлгани номаълум”, — дейилади хабарда.
NYTнинг қайд этишича, қатл этилишидан бироз олдин Акбарий Ғарбга аудио хабар юборишга муваффақ бўлган, унда у ҳамма нарсани тан олишга мажбур бўлгани, сабаби чексиз қийноқ ва сўроқларга дуч келганини айтган. Бу эътирофлар Эрон телевидениесида эфирга узатилган. Али-Ризо Акбарий Эронда 1982 йилдан бери қатл этилган энг юқори мартабали собиқ амалдорга айланди.
Изоҳ (0)