Eron energetika vaziri Abbos Aliobodiy Rossiya energetika haftaligi doirasida o‘tkazilgan BRIKS energetika vazirlari yig‘ilishida Rossiya, BAA va Saudiya Arabistoni elektr tarmoqlarini Eron orqali birlashtirishni taklif qildi.
Aliobodiyning qayd etishicha, Eron o‘z tarmog‘ini quruqlikdagi chegarasi bo‘lgan barcha davlatlar bilan bog‘lab, elektr tranzitini rivojlantirish niyatida. Unga ko‘ra, Eron, Rossiya, BAA va Saudiya Arabistoni elektr tarmoqlarini birlashtirish ishlab chiqarish sohasiga sarmoyalarni qisqartirish, atrof-muhitni yaxshilash va mintaqaviy darajada xavfsizlikni oshirish imkonini beradi.
2024-yil iyun oyida Eronning sobiq energetika vaziri Ali Akbar Mehrabiyan Shanxay hamkorlik tashkilotiga (SHHT) aʼzo davlatlar o‘rtasida mintaqaviy elektr energiyasi bozorini yaratishni taklif qilgan. Bu elektr tarmoqlarining barqarorligi va samaradorligini oshiradi. Uning so‘zlariga ko‘ra, uni SHHTning boshqa a’zolari ham qo‘llab-quvvatlagan. Shu munosabat bilan Mehrabiyan energetika markazining kelajagini baholash uchun ishchi guruh tuzishga chaqirgan.
Izoh (0)