“Реал” футболчилари клуб раҳбариятидан Родригони сотмасликни талаб қилмоқда

Мадриднинг “Реал” клуби бразилиялик вингер Родриго билан хайрлашиш фикридан қайтиши мумкин. Бу ҳақда TBR Football нашри хабар бермоқда.

Манбага кўра, “қаймоқранглилар”нинг икки юлдузи — Килиан Мбаппе ва Винисиус Жуниор клуб раҳбариятига мурожаат қилиб, Родригонинг трансфер қилинмаслигини сўрашган. Уларнинг фикрича, Родриго жамоанинг асосий ўйинчиларидан бири ҳисобланади ва клубнинг барча мусобақаларда чемпион бўлиши учун Родригонинг ёрдами тегиши мумкин.

Шунингдек, Федерико Вальверде ва Жуде Беллингем каби ярим ҳимоячилар ҳам бош мураббий Хаби Алонсога Родригони сақлаб қолиш зарурлигини билдирган.

Аввалроқ Родригога бир нечта Англия Премьер Лигаси клублари, хусусан “Арсенал” ва “Ливерпуль” жиддий қизиқаётгани ҳақида хабарлар тарқалган эди. Ҳатто футболчининг агенти Пини Заҳави Лондонга учиб кетгани ва у ерда ушбу клублар вакиллари билан музокаралар ўтказиши мумкинлиги айтилган эди.

• Родриго 2019 йилдан буён “Реал” сафида ҳаракат қилиб келмоқда.
• У клуб таркибида 270 та ўйинда майдонга тушиб, ўз ҳисобига 68 та гол ва 51 та голли узатма ёздириб қўйган.
• Transfermarkt портали футболчининг қийматини 90 миллион еврога баҳоламоқда.