AQSH Kolumbiyaga sanksiyalar joriy etishi fonida Kolumbiya prezidenti Gustavo Petro amerikalik hamkasbi Donald Trampga murojaat qildi. U hamkasbini ochko‘zlik va manmanlikda aybladi.
Tramp, ochig‘ini aytsam, AQSHga sayohat qilishni unchalik yoqtirmayman, u biroz zerikarli, lekin tan olishim kerak, u yerda maqtovga loyiq narsalar ham bor. Vashingtonning qora tanlilar yashaydigan hududlariga borishni yaxshi ko‘raman. U yerda qora tanlilar va lotin amerikalikliklari o‘rtasida barrikadalar bilan bo‘lgan janjalni ko‘rdim. Bu menga g‘alati tuyuldi, chunki ular birlashishi kerak edi, dedi prezident Petro.
U amerikalik hamkasbi “ochko‘zligi tufayli insoniyatni yo‘q qilayotgani”ga to‘xtaldi.
Balki bir kuni, gastritimga qaramay ichishga rozi bo‘ladigan viski ustida, bu haqda ochiqchasiga gaplashamiz. Ammo bu qiyin, chunki meni va har qanday kolumbiyalikni past irqdan deb hisoblaysiz, vaholanki, unday emasmiz. Agar qaysar odamni taniydigan bo‘lsangiz, bu menman. Siz Allendega qilganlaridek, iqtisodiy kuchingiz va manmanligingiz bilan davlat to‘ntarishini amalga oshirishga urinib ko‘rishingiz mumkin, dedi u.
Gustavo Petro Kolumbiya yonida quldorlarni ko‘rishni istamasligini qayd etdi.
“Sizga bizning erkinligimiz yoqmaydi, mayli. Men oq tanli quldorlar bilan qo‘l berib ko‘rishmayman”, deya xulosa qildi Kolumbiya rahbari.
Kolumbiya va AQSH o‘rtasida migrantlar bo‘yicha keskinlik
Kolumbiya prezidenti deportatsiya qilingan kolumbiyaliklarni tashiyotgan AQSH samolyoti mamlakatga kiritilmasligini aytdi. Tramp bunga javoban Kolumbiya tovarlariga 25 foizlik boj, Kolumbiya amaldorlarining AQSHga kirishini taqiqlash, “viza sanksiyalari” joriy etishini ta’kidladi. U kolumbiyalik hamkasbini “xalqi orasida unchalik mashhur bo‘lmagan” rahbar deb atadi.
Kolumbiya ham AQSHdan keladigan tovarlarga javob bojlarini joriy qilishini bildirdi. Respublika prezidenti Gustavo Petro Amerika tovarlarini mahalliy mahsulotlar bilan almashtirishga chaqirdi. U AQSHdan migrantlarga jinoyatchilarday munosabatda bo‘lmaslikni so‘radi. Sababi migrantlar qo‘lida kishan va harbiy samolyotda deportatsiya qilingan. Endilikda Kolumbiya AQSHdan deportatsiya qilinayotgan fuqarolarini vataniga qaytarish uchun prezident samolyotidan foydalanadi. Migrantlarni qabul qilishga rozilik bergani sababli AQSH bojlar va sanksiyalarning bir qismini bekor qildi.
Izoh (0)