AQSh prezidenti Jo Bayden Jon Kennedining 63 yoshli qizi Kerolayn Kennedini mamlakatning Avstraliyadagi elchisi lavozimiga nomzod qilib ko‘rsatishni rejalashtirmoqda, deb yozmoqda Axios yangiliklar portali.
Shuningdek, Bayden AQShning 35-prezidentining ukasi, senator Ted Kennedining bevasi Viktoriyani G‘arb davlatlaridan biriga mamlakatning diplomatik vakolatxonasi rahbari lavozimiga nomzodini ko‘rsatish imkoniyatini muhokama qilmoqda.
Nashrning ma’lum qilishicha, Bayden Amerikaning eng taniqli siyosiy sulolasini yana diqqat markaziga olib chiqishni va shu tariqa marhum ustozi va do‘stiga hurmat ko‘rsatishni maqsad qilgan.
Bu masala bo‘yicha Oq uydan rasmiy izoh berilmagan.
Kerolayn Kennedi birinchi navbatda AQShning 35-prezidenti Jon Kennedining qizi, keyin diplomat, advokat va yozuvchi sifatida tanilgan bo‘lib, 2013-yilda u AQShning Yaponiyadagi birinchi ayol elchisiga aylangan hamda harbiy va savdo aloqalarni, mamlakatlar o‘rtasida talabalar almashinuvi dasturini o‘rnatgan. AQShning sobiq prezidenti Donald Trampning inauguratsiya marosimidan avvalroq Kerolayn ushbu postni tark etgan.
Kerolayn Kennedi Nyu-Yorkdagi Convent of the Sacred Heart rim-katolik qizlar maktabini va Massachusetsdagi Concord Academy maktabini tamomlagan. 1980-yil u Garvard universiteti qoshidagi Redkliff Istiqbolli tadqiqotlar institutda san’at sohasida bakalavr darajasini olgan, 1988-yilda esa Kolumbiya universitetida yuridik fanlar doktori bo‘lgan.
Izoh (0)