Venesuela prezidenti Nikolas Maduro AQSH sobiq prezidenti Donald Trampni 2018-yilda unga qarshi suiqasd uyushtirganlikda aybladi, deb yozmoqda TeleSUR.
Venesuela Milliy gvardiyasining 86 yilligini nishonlash marosimida Maduroning aytishicha, Tramp va uning hukumati Kolumbiya sobiq prezidenti Xuan Manuel Santosga Maduroning hayotiga suiqasd uyushtirishni buyurgan.
Uning so‘zlariga ko‘ra, Xuan Manuel Santos o‘z prezidentligining so‘nggi kunlarida “terrorchi guruh tayyorlash”ni moliyalashtirgan, suiqasddan bir necha kun oldin esa Venesuela tez orada “qulashi va rejimni o‘zgartirishi”ni aytgan.
Eslatib o‘tamiz, Maduroga suiqasd 2018-yilning 4-avgustida Karakasda Milliy bolivar gvardiyasi tashkil etilganining 81 yilligiga bag‘ishlangan tantanali marosimdagi nutqi vaqtida amalga oshirilgan edi.
Venesuela ichki ishlar vaziri Nestor Reverolning so‘zlariga ko‘ra, suiqasd tashkilotchilari C4 portlovchi moddalari bilan to‘ldirilgan ikkita drondan foydalangan. Har bir uchoqda taxminan bir kilogramm portlovchi modda bo‘lgan. Dronlar mamlakat prezidenti minbarda turgan Bolivar prospekti bo‘ylab uchishi rejalashtirilgan. Prezident gvardiyasining snayperlari yaqinlashib kelayotgan dronlarni urib tushirgan.
Xavfsizlik xodimlari Maduroni o‘q o‘tkazmaydigan jilet bilan o‘rab, minbardan olib ketgan. Prezidentning o‘zi jabrlanmagan, biroq bir necha askar yaralangan.
Izoh (0)