Norvegiyalik deputat Marius Nilsen so‘z erkinligini himoya qilishdagi faoliyati uchun Ilon Maskni Tinchlik uchun Nobel mukofotiga nomzod qilib ko‘rsatdi. Bu haqda Daily Mail xabar berdi.
Deputat Ilon Mask nomzodini u “muloqot, so‘z erkinligi va o‘z fikrlarini bildirish imkoniyatini qat’iy himoya qilgani” uchun ilgari surganini aytdi. Nilsen milliarderning Starlink sun’iy yo‘ldosh tarmog‘iga ham to‘xtalib o‘tdi. Norvegiyalik siyosatchining so‘zlariga ko‘ra, undan Ukrainada foydalanish jangchilarga “muloqot qilish, muvofiqlashtirish va Rossiya hujumiga qarshi turish” imkonini beradi.
“Mask asos solgan, egalik qilgan yoki boshqarayotgan ko‘plab texnologik kompaniyalar jamiyatni yaxshilashga, Yer va koinot haqidagi bilimlarni kengaytirishga hamda butun dunyo bo‘ylab va o‘zaro aloqalarni ta’minlashga qaratilgan. Ular dunyoni yanada uzviy bog‘lab, xavfsiz joyga aylantirishga yordam berdi”, — deydi Nilsen.
Mart oyida Nobel qo‘mitasi barcha taklif etilgan nomzodlarni ko‘rib chiqadi va qisqa ro‘yxatni tasdiqlaydi.
2023-yili Tinchlik bo‘yicha Nobel mukofoti eronlik huquq himoyachisi Nargiz Muhammadiyga ayollar zulmiga qarshi kurashi uchun berilgan edi.
Izoh (0)