AQSH prezidenti Donald Tramp Germaniya kansleri Fridrix Merts bilan uchrashuvda AQSH gazi va neftini yetkazib berish hajmini oshirishni taklif qildi.
Tramp buni hozirda AQSH va Yevropa Ittifoqi o‘rtasida muhokama qilinayotgan savdo bitimiga kiritishni ilgari surgan. Yevroittifoq ilgari ham AQSHdan energiya resurslarini ko‘proq xarid qilishga tayyor edi. Bu Trampning savdo defitsiti haqidagi xavotirlarini kamaytirishga yordam berardi. Ayni paytda taklif Germaniya uchun foydali bo‘lishi mumkin.
Rossiya “Shimoliy oqim” orqali Yevropaga gaz yetkazib berishni tiklash uchun amerikaliklarni jalb qilishga harakat qildi. Bu esa Mertsni ushbu rejalarga qarshi kurashishga majbur qildi, deyiladi xabarda.
Savdo kelishuvi Mertsning Oq uyga birinchi tashrifi davomida muhim mavzularidan biri bo‘ldi. Trampning so‘zlariga ko‘ra, u kelishuv natijasida amerikalik energiya resurslari eksporti oshishiga umid qilmoqda va Merts bunga yordam beradi:
Bizda yaxshi savdo bitimi bo‘ladi. Menimcha, bu asosan Yevropa Ittifoqi tomonidan belgilanadi, lekin siz buning juda katta qismi hisoblanasiz. Bizda juda ko‘p neft va gaz bor, degan AQSH prezidenti.
2024-yilda Yevropa Ittifoqi AQSHdan taxminan 51 milliard kub metr suyultirilgan tabiiy gaz (STG) sotib oldi, bu esa Yevropaning 114 milliard kub metrlik STG importining 45 foizini tashkil etdi. AQSH eng yirik yetkazib beruvchi bo‘ldi. Rossiya ikki baravar kam STG sotdi (25 milliard kub metr), biroq uning quvur orqali gaz yetkazib berish hajmi 2021-yildan beri 155 milliarddan 40 milliard kub metrgacha kamaygan bo‘lsa-da, xuddi shu davrda Yevropa Ittifoqi mamlakatlariga STG eksporti ikki baravarga oshdi.
Yevropa Ittifoqi 2027-yil oxirigacha Rossiya energiya tashuvchilaridan butunlay voz kechmoqchi. Yevrokomissiya tegishli rejani tayyorlamoqda, biroq bir qator davlatlar bunga qarshi chiqmoqda. Vengriya va Slovakiya gaz yetkazib berishdan bosh tortmoqchi emas. Fransiya va Belgiya esa Yevropa Ittifoqidan aniqroq huquqiy va iqtisodiy asoslarni taqdim etishni talab qilmoqda.
Izoh (0)