Trampga doim noma’lum raqamlardan qo‘ng‘iroq keladi, u esa har safar javob beradi — OAV

AQSH prezidenti Donald Tramp begona raqamlardan qo‘ng‘iroqlar bo‘lsa, ularga doim javob beradi. Bu haqda manbalarga tayanib The Atlantic xabar berdi.

Mavjud xavfsizlik protokollariga zid ravishda Tramp prezident uchun mo‘ljallangan maxsus himoyalangan qurilma o‘rniga o‘zining shaxsiy smartfonidan foydalanmoqda. U eski iPhone’idan nafaqat yaqinlari bilan, balki amaldorlar, jurnalistlar, biznes vakillari va hatto xorijiy yetakchilar bilan ish yuzasidan muloqot qilish uchun ham foydalanadi.

The Atlantic ma’lumotiga ko‘ra, prezident smartfonida u yillar davomida ishlatib kelgan telefon raqami saqlanib qolgan. Bu raqamni o‘nlab, balki yuzlab odamlar biladi. Eng yomoni, Tramp notanish raqamlardan kelayotgan qo‘ng‘iroqlarga ham javob beradi.

AQSH prezidentining anonim maslahatchilaridan biri Trampning shunday qo‘ng‘iroqlardan biriga qanday munosabat bildirganini so‘zlab berdi:

Men ketishim kerak, menga boshqa mamlakatdan kimdir qo‘ng‘iroq qilmoqda, deb aytgan Tramp telefon jiringlaganda.

U qo‘ng‘iroq qaysi mamlakatdan ekanligini bilmaydi, faqat raqamni ko‘rib, “Ehtimol, bu men bilan gaplashmoqchi bo‘lgan xorijiy yetakchidir”, deb o‘ylaydi, deydi anonim manba.

Xitoylik xakerlar uning telefonini allaqachon tinglayotgani haqida ma’lumotlar borligiga qaramay, AQSH prezidenti bu borada unchalik tashvishlanmasligi ta’kidlangan.

Bu, ayniqsa, so‘nggi yillarda Xitoyning telefon tarmoqlariga kirib borishi haqida bilganlarimizni hisobga olsak, shubhasiz, ulkan xavfdir, deydi Barak Obamaning sobiq milliy xavfsizlik bo‘yicha maslahatchisi o‘rinbosari Ben Rouds.

Biroq xavfsizlik sohasidagi mutaxassislar ta’kidlashicha, asosiy xavf xitoylik xakerlarda emas, balki AQSH prezidentiga firibgarlar yoki hazilkashlar (prankerlar) bevosita qo‘ng‘iroq qilib, gaplasha olishi mumkinligidadir. Bunday holatlar dunyo siyosatchilari bilan vaqti-vaqti bilan sodir bo‘lib turadi.

AQSH kontrrazvedkasi sobiq rahbari Joel Brenner xavfsizlik protokollari bejiz yaratilmaganini bildirgan. Uning fikricha, Tramp istalgan vaqtda xorijiy yetakchi bilan tegishli tayyorgarliksiz yoki xabardor xodimlar ishtirokisiz suhbatlashishi, hattoki bu suhbatda mutaxassislar bilan maslahatlashmay muhim kelishuvlar yoki imtiyozlar berishga rozi bo‘lishi katta xavfdir.

The Atlantic yozishicha, Trampning jamoasi uni shaxsiy telefondan foydalanishni to‘xtatishga ishontirishga harakat qilgan, ammo u xavf darajasini tushunmayapti yoki uni e’tiborsiz qoldirmoqda.