AQSH prezidenti Donald Tramp sobiq prezident Jo Baydenning sog‘lig‘i, shuningdek, uning yordamchilari tomonidan prezident imzosidan foydalanishi bilan bog‘liq tergovni boshlashga ko‘rsatma berdi. Bu haqda Oq uy tomonidan e’lon qilingan memorandumda ma’lum qilingan.
“So‘nggi oylarda sobiq prezident yordamchilari Baydenning aqliy qobiliyati pasayganini yashirish uchun avtoimzodan foydalanib, prezident imzolarining ahamiyatini suiiste’mol qilgani tobora aniq bo‘lib bormoqda”, deyiladi hujjatda.
Memorandumda ta’kidlanishicha, Baydenning imzosi keskin siyosiy o‘zgarishlarni amalga oshirish uchun “minglab hujjatlarda ishlatilgan” bo‘lsa-da, ijro hokimiyati aslida kimga tegishli ekanini Amerika jamoatchiligidan ataylab yashirgan bo‘lishlari mumkin.
Hujjatda qayd etilishicha, Baydenning aksariyat farmonlari prezidentning o‘z qo‘li bilan emas, balki avtoimzo yordamida imzolangan. Bu ayniqsa uning prezidentlik muddatining ikkinchi yarmida qabul qilingan farmonlarga xos bo‘lib, bu davrda uning kognitiv buzilishlari “u bilan ishlaganlar uchun yanada yaqqolroq ko‘ringan.
Ta’kidlanishicha, bosh prokuror Oq uyning yuridik maslahatchisi bilan birgalikda tekshiruv o‘tkazib, avtoimzoni qo‘llash to‘g‘risidagi buyruqni kim berganini, shuningdek, aynan qaysi hujjatlar, jumladan, afv etish to‘g‘risidagi farmonlar va ijro farmonlari shu tarzda imzolanganini aniqlaydi.
20-may kuni Tramp Bayden hokimiyatda bo‘lganida rasmiy hujjatlarni o‘zi imzolamaganini ma’lum qilgandi. AQSH prezidentining fikricha, Bayden davrida haqiqiy boshqaruvni davlat rahbarining avtomatik imzosidan foydalanish huquqiga ega bo‘lgan “radikal so‘l telbalari” amalga oshirgan.
AQShning amaldagi prezidenti Donald Tramp Baydenning avtoimzo bilan bog‘liq mojarosini AQSH tarixidagi eng yirik mojarolardan biri deb atadi. Uning fikricha, Bayden ma’muriyati tomonidan avtoimzo bilan imzolangan afvlar haqiqiy emas.
Respublikachilarga yaqin bo‘lgan New York Post gazetasining avvalroq Oq uyning ikki sobiq xodimiga tayanib, Baydenning asosiy yordamchilaridan biri rasmiy hujjatlarni imzolash uchun avtoimzodan foydalanib, o‘z vakolatlarini oshirib yuborgan bo‘lishi mumkinligini yozgan edi.
May oyi oxirida Kongress Vakillar palatasining Nazorat va hukumat islohoti qo‘mitasi raisi, respublikachi Jeyms Komer Fox News efirida Bayden nomidan hujjatlarga avtoimzo yordamida imzo qo‘ygan Oq uyning to‘rt nafar xodimi shaxsi aniqlanganini ma’lum qildi.
Izoh (0)