Andijon viloyatining Marhamat tumanida o‘tkazilgan tezkor-profilaktik tadbir davomida giyohvandlik moddasini sotish va saqlash bilan shug‘ullanuvchi ikki nafar shaxs ushlandi. Bu haqda “Daryo”ga viloyat ichki ishlar boshqarmasi axborot xizmati xabar berdi.
Ma’lum qilinishicha, Ichki ishlar vazirligi tezkor-qidiruv departamenti, Andijon viloyati ichki ishlar boshqarmasi Tezkor-qidiruv xizmati Jinoyat qidiruv boshqarmasi hamda boshqa huquqni muhofaza qiluvchi organlar bilan hamkorlikda Marhamat tumanida tezkor tadbir o‘tkazilgan.
Tezkor tadbir natijasida Marhamat tumanida yashovchi ikki nafar shaxs 288 gramm gashish giyohvand moddasini 3500 AQSH dollariga sotayotgan vaqtida qo‘lga olingan. Bundan tashqari, tezkor-tadbir davomida ushlangan shaxslar o‘zlarining yashash uylarida og‘irligi 306 gramm gashish giyohvand moddasini saqlab kelayotganliklari ham fosh etilgan.
O‘tkazilgan tezkor tadbir davomida umumiy og‘irligi 594 gramm gashish giyohvand moddasi daliliy ashyo sifatida olingan.
Mazkur holat yuzasidan Marhamat tumani ichki ishlar bo‘limi huzuridagi tergov guruhi tomonidan Jinoyat kodeksining 273-moddasi 5-qismi bilan jinoyat ishi qo‘zg‘atilib, hozirda tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)