O‘zbekiston Davlat xavfsizlik xizmati Tojikiston va Qirg‘izistondan kontrabanda yo‘li bilan keltirilgan giyohvandlik vositalarini aniqlab, noqonuniy savdoni amalga oshirayotganlarni qo‘lga oldi.
DXXning Farg‘ona viloyati bo‘yicha boshqarmasi xodimlari tomonidan o‘tkazilgan tezkor-qidiruv tadbirlari doirasida, Toshloq tumanida yashovchi, 2006-yilda tug‘ilgan shaxs yashash xonadoni ko‘zdan kechirilgan.
Natijada, ushbu manzilda kelgusida sotish maqsadida saqlab kelinayotgan 27 kilo 573 gramm gashish va 3 kilo 967 gramm opiy giyohvandlik vositalari borligi aniqlanib, prosessual tartibda rasmiylashtirib olingan. Aniqlanishicha, ushbu narkotik moddalar Tojikistondan kontrabanda yo‘li bilan olib kelingan.
Bu yo‘nalishda DXXning Andijon viloyati bo‘yicha boshqarmasi xodimlari tomonidan ham viloyat bojxona boshqarmasi bilan hamkorlikda tezkor tadbirlar o‘tkazilgan.
Xususan, Andijon viloyatining Qo‘rg‘ontepa tumanida yashovchi, 1986-yilda tug‘ilgan fuqaro Qirg‘izistonning O‘sh viloyatida istiqomat qiluvchi, 1984-yilda tug‘ilgan shaxs bilan o‘zaro til biriktirib, 1 kilo 806 gramm mefedron sintetik giyohvandlik vositasini xaridorga 80 ming AQSH dollariga sotayotgan vaqtlarida qo‘lga olingan.
Shuningdek, tezkor tadbir davom ettirilib, Qo‘rg‘ontepa tumanida yashovchi fuqaroning uyidan ham 2 kilo 698 gramm mefedron moddasi tegishli tartibda rasmiylashtirib olingan. Ushbu sintetik narkotik moddalar Qirg‘izistonda olib kelingan.
Hozirda ushbu holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)