Andijonda giyohvand modda iste’mol qilib kelgan ayol 3 yil muddatga ozodlikdan mahrum qilindi

Jinoyat ishlari bo‘yicha Andijon shahar sudi doimiy ravishda giyohvand moddalar iste’mol qilib yuruvchi ayolga hukm o‘qidi. Bu haqda “Daryo”ga viloyat sudi axborot xizmati xabar berdi.

“Menda bronxial astma, nafas yetishmovchiligi kasalligi mavjud. Shu sababli bir necha yildan buyon ‘Tramadol’, ‘Lirika’ va ‘Tropikamid’ kabi dori moddalarini ichib kelaman. Ushbu dorilarni ichsam o‘zimni yaxshi xis qilaman. Lekin dorilarni ichish bo‘yicha hech qanday shifokorning tavsiyasi yo‘q. Bir tanishim shu dorilarni ichib tursam yaxshi bo‘lishimni tavsiya qilgani uchun foydalanaman. Shuning uchun ham ularni doimiy ravishda yonimda, sumkamda va mashinamda olib yuraman. Tirikchilik qilish maqsadida maishiy texnikalar savdosi bilan shug‘ullanaman va nasiyaga tardbirkorlarga tarqatib so‘ng pulini yig‘ib yuraman. O‘zim sotgan televizor va shunga o‘xshash narsalarimning pullarini olish maqsadida Andijon shahri Yangi bozor tarafda joylashgan noqonuniy dori bozori yoniga kelganimda, IIB xodimlari yonimga kelib, o‘zimni shubhali tutganimni aytib, xolislar ishtirokida ko‘zdan kechirganlarida sumkamdan  dori vositalari borligi aniqlandi. Bundan tashqari o‘zim IIB xodimlariga yana boshqa dorilarim borligini aytib, topshirdim. Bu dorilarni sotish niyatim bo‘lmagan. Qilmishimdan pushaymonman, yengillik berishingizni so‘rayman”, — degan sudlanuvchi o‘z ko‘rsatmasida.

Ishni ko‘rib chiqqan sudya Sardor Rasulov M.N.ni Jinoyat kodeksining 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi “a” bandi bilan aybli deb topib, unga nisbatan 3 yil 1 oy muddatga ozodlikdan mahrum qilish jazosi tayinlagan.

Shuningdek, narkologiya ekspertizasida uning taksikomaniya 1-bosqich tramadol giyohvandlik kasalligi bilan og‘rishi va majburiy davolanishga muhtojligi ko‘rsatilgani sababli jazoni o‘tash davrida Jinoyat kodeksining 96-moddasi tartibida giyohvandlik kasalligidan majburiy davolanish choralari qo‘llanilishi belgilab qo‘yilgan.