DXXning Surxondaryo viloyati bo‘yicha boshqarmasi xodimlari tomonidan viloyat bojxona va ichki ishlar boshqarmalari bilan hamkorlikda Afg‘oniston—Tojikiston—O‘zbekiston yo‘nalishida giyohvandlik vositalarining noqonuniy aylanmasi bilan shug‘ullanuvchi transchegaraviy jinoiy guruh faoliyatiga chek qo‘yildi, deb xabar bermoqda O‘zA.
Dastlab Sariosiyo tumanida tezkor tadbir o‘tkazilganda Sho‘rchi va Uzun tumanlarida yashovchi uch nafar fuqaro ketayotgan Lacetti to‘xtatilib ko‘zdan kechirilganda, muqaddam ikki nafari sudlangan ushbu shaxslar yonida 670 gramm gashish borligi aniqlangan.
Shuningdek, ushbu giyohvand modda Sariosiyo tumanida istiqomat qiluvchi, muqaddam giyohvandlik vositalari savdosi bilan bog‘liq jinoyati uchun sudlangan shaxsdan 2800 dollarga sotib olingani ma’lum bo‘lib, u ham qo‘lga olingan.
Tezkor tadbirning ikkinchi bosqichida esa Boysun tumanidagi “Darband” YPX maskanida Uzun tumanida yashovchi 3 nafar shaxs ketayotgan Nexia-2 to‘xtatilib, ko‘zdan kechirilganda avtomashina salonida 9 kilogramm 410 gramm gashish borligi aniqlanib, protsessual tartibda rasmiylashtirib olingan.
Tergovga qadar tekshiruv harakatlari davomida, tojikistonlik narkokuryerlar tomonidan Uzun tumani hududiga o‘tkazilgan mazkur giyohvandlik vositasi aslida Samarqand viloyatida kutib turgan xaridorlarga yetkazilishi kerakligi ma’lum bo‘lgan.
Tezkor tadbir davom ettirilib, Nurobod tumanida ushbu narkotik moddaning ma’lum bir qismini qabul qilib olgan vaqtda Samarqand va Andijon shaharlarida yashovchi uch nafar fuqaro ham ushlangan.
Shuningdek, Denov tumanida istiqomat qiluvchi fuqaro xonadonida 964 gramm gashish borligi aniqlanib, u ham o‘rnatilgan tartibda rasmiylashtirib olingan.
O‘tkazilgan tezkor tadbir davomida jami 11 nafar shaxs ushlanib, ulardan 11 kilogramm 44 gramm gashish moddasi musodara qilingan.
Hozirda mazkur fuqarolarga nisbatan DXXning Surxondaryo viloyati bo‘yicha boshqarmasi tomonidan jinoyat ishi qo‘zg‘atilib, tergov harakatlari olib borilmoqda.
Izoh (0)