Qirg‘izistondan O‘zbekistonga kontrabanda yo‘li bilan olib o‘tilgan qariyb 2 kilogrammga yaqin gashish moddasi savdosiga chek qo‘yildi, deb xabar beradi Oliy sud matbuot kotibi.
Ma’lum qilinishicha, Farg‘ona viloyati Quva tumanida yashovchi F.SH. (muqaddam sudlangan) fuqarolar D.T., A.B. hamda qirg‘izistonlik “Nurlan” ismli shaxslar bilan giyohvandlik moddasi savdosining jinoiy rejasini tuzgan. F.ning vazifasi ko‘p miqdordagi giyohvandlik vositasini O‘zbekistonga o‘tkazishda yordam berish bo‘lgan. A.B. va F.SH. avtomashinasini garovga qo‘yib, 7 ming dollar olgan va F.ning ko‘rsatmasi bilan Qirg‘iziston fuqarosi “Nurlan” ismli shaxs bilan uchrashgan. Undan 5 ming dollarga giyohvandlik moddasini sotib olib, O‘zbekiston hududiga o‘tkazib berishga kelishgan.
D.T. Quva tumanidagi chegara hududida ko‘p miqdordagi giyohvandlik vositasini qabul qilib olib, F.ning topshirig‘iga asosan Andijon tumani “Chem” mahallasida A.B.ga yetkazgan. O‘tkazilgan tezkor tadbirda A.B. juda ko‘p miqdordagi giyohvandlik vositasini kelgusida sotishni maqsad qilgan vaqtda daliliy ashyo bilan qo‘lga olingan.
Sud-kimyoviy ekspertizaning xulosasiga ko‘ra, olingan vosita gashish giyohvandlik moddasi bo‘lib, sof og‘irligi 1986 grammligi aniqlangan. Sud hukmiga ko‘ra, F.SH.ga 10 yil 6 oy muddatga ozodlikdan mahrum etish jazosi tayinlangan.
Eslatib o‘tamiz, sentyabr oyida Toshkent xalqaro aeroportida so‘nggi 30 yil ichidagi eng yirik miqdordagi — 8,5 tonna giyohvandlik moddasi to‘xtatib qolingan edi.
Izoh (0)