"Davlat xavfsizlik xizmati xodimlari tomonidan respublika bo‘ylab giyohvandlik vositalari savdosiga qarshi tadbirlar o‘tkazildi", deb xabar beradi O‘zA.
Davlat xavfsizlik xizmatining Sirdaryo viloyati bo‘yicha boshqarmasi xodimlari tomonidan viloyat bojxona va ichki ishlar boshqarmalari bilan hamkorlikda o‘tkazilgan tezkor tadbirda Surxondaryo—Toshkent yo‘nalishida harakatlanayotgan, Denov shahrida yashovchi 43 yoshli fuqaro boshqaruvidagi Lacetti rusumli avtomashina “Sirdaryo” YPX maskanida to‘xtatilib, tekshirilgan.
Natijada avtomashina salonida 999 gramm gashish moddasi borligi aniqlanib, protsessual tartibda rasmiylashtirib olingan. Aniqlanishicha, mazkur shaxs muqaddam giyohvandlik vositalari savdosi bilan bog‘liq jinoyati uchun jazo muddatini o‘tagan.
Boshqa bir holatda esa 55 yoshli Qirg‘iziston fuqarosi 395 gramm gashish moddasini kontrabanda yo‘li bilan O‘zbekistonga olib kelib, Oltinko‘l tumanida yashovchi 37 yoshli ayol bilan birgalikda uni sotishni rejalashtirgan.
DXX Andijon viloyati bo‘yicha boshqarmasi hamda viloyat IIB xodimlari hamkorligida o‘tkazilgan tezkor tadbirda ular 186 gramm gashishni Andijon shahrida yashovchi, 1963-yilda tug‘ilgan, muqaddam sudlangan shaxsga 1,6 ming AQSH dollariga sotishga kelishib, oldindan 600 AQSH dollari olgan vaqtlarida qo‘lga olingan. Shuningdek, ayolning uyidan narkotik moddaning qolgan 209 gramm qismi ham tegishli tartibda rasmiylashtirib olingan.
DXX Toshkent shahar bo‘yicha boshqarmasi xodimlari tomonidan boshqa huquqni muhofaza qiluvchi organlar bilan hamkorlikda o‘tkazilgan tezkor tadbirda poytaxt hududida kuchli taʼsir qiluvchi dori vositalarining noqonuniy savdosi bilan shug‘ullanuvchi 3 nafar shaxs ushlanib, ulardan 19 340 dona “Zardeks” dori vositasi protsessual tartibda rasmiylashtirib olindi.
Aniqlanishicha, ushbu dori vositalari Qirg‘izistondan olib kelingan.
Bundan tashqari, Qibray tumanida yashovchi, 1991-yilda tug‘ilgan, muqaddam sudlangan shaxs boshqaruvidagi Lacetti rusumli avtomashina poytaxtning Mirzo Ulug‘bek tumani hududida harakatlanayotgan vaqtida DXX Toshkent viloyati bo‘yicha boshqarmasi, shahar IIBB Yo‘l-patrul xizmati hamda Milliy Gvardiya xodimlari tomonidan to‘xtatilib, ko‘zdan kechirilgan.
Natijada avtomashina salonida Qirg‘izistondan keltirilgan 1 666 dona “Regapen” va 134 dona “Tropikamid” kuchli taʼsir qiluvchi dori vositalari borligi aniqlanib, o‘rnatilgan tartibda rasmiylashtirib olingan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.