Giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmatining Andijon viloyati bo‘yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda bir nechta tezkor tadbirlar o‘tkazildi.
Xususan, Andijon shahrida yashovchi, 35 yoshli fuqaro boshqaruvidagi Equinox avtomashinasi Oltinko‘l tumanida to‘xtatilib, ko‘zdan kechirilganda, uning salon qismida 1 kilogramm 988 gramm gashish moddasi borligi aniqlanib, tegishli tartibda rasmiylashtirib olingan.
Tezkor surishtiruv harakatlari davomida, Andijon shahrida yashovchi, muqaddam giyohvandlik vositalari savdosi bilan bog‘liq jinoyati uchun sudlangan 34 yoshli shaxs ushbu gashishni Tojikistondagi narkosavdogarlardan 5,5 ming dollar evaziga Namangan viloyatining Pop tumani hududiga keltirib berish sharti bilan sotib olgani aniqlanib, u ham protsessual tartibda qo‘lga olingan.
O‘z navbatida Equinox avtomashinasi egasi ushbu giyohvandlik vositasini tojikistonlik narkokuryerlar tomonidan qoldirib ketilgan xufiya joydan olib, jinoiy sherigining yoniga ketayotgan bo‘lgan.
Boshqa holatda esa Qirg‘izistondan giyohvandlik vositalarini olib kelib, sotish bilan shug‘ullangan ikki nafar shaxs ushlangan. Xususan, Jalaquduq tumanida yashovchi, 46 yoshli fuqaro 100 gramm gashish moddasini Andijon shahrida istiqomat qiluvchi 49 yoshli jinoiy sherigiga olib ketayotgan vaqtida qo‘lga olingan.
Shuningdek, uning yashash xonadonidan 586 gramm gashish, jinoiy sherigi uyidan esa 19 gramm gashish moddasi protsessual tartibda rasmiylashtirib olingan.
Andijon shahrida yashovchi, muqaddam sudlangan shaxs esa o‘z o‘g‘lining boshqaruvida bo‘lgan Kia avtomashinasida Toshkent shahri tomon harakatlanayotgan vaqtida Bo‘ston tumanidagi 44-sonli YPX maskanida to‘xtatilgan.
Avtomashina xolislar ishtirokida ko‘zdan kechirilganida, uning salon qismida Qirg‘iztondan keltirilgan 673 gramm gashish moddasi hamda 42 dona kuchli taʼsir qiluvchi dori vositalari borligi aniqlanib, protsessual tartibda rasmiylashtirib olingan. Shuningdek, uning yashash xonadonidan ham 14 dona kuchli taʼsir qiluvchi dori vositalari olingan.
Andijon shahrida qayd etilgan yana bir holatda, muqaddam sudlangan 54 yoshli shaxs Qirg‘izistondan narkotik moddalar olib kelib, sotishini boshqalardan sir tutish maqsadida, shaharning boshqa hududidan ijaraga uy olgani aniqlangan.
Uning ijaraga olgan xonadoni ko‘zdan kechirilganda, kelgusida sotish maqsadida saqlab kelinayotgan jami 269 gramm gashish moddasi va 1 dona elektron tarozi borligi aniqlanib, tegishli tartibda hujjatlashtirib olingan.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)