Suriyadagi vaziyatni yoritayotgan xalqaro terroristik tashkilot aʼzosi o‘zbekistonlik Xudoyor Nuriddinov qidiruvga berildi. Bu haqda IIV matbuot xizmati xabar berdi.
Abu Valid nomi bilan faoliyat yurituvchi Nuriddinov Xudoyor 1994-yilda Farg‘onaning Rishton tumanida tug‘ilgan. Unga nisbatan DXX tomonidan Jinoyat kodeksining:
- 155-modda prim-2 (Terrorchilik faoliyatini amalga oshirish maqsadida o‘quvdan o‘tish, chiqish yoki harakatlanish);
- 159-modda (O‘zbekiston Respublikasining konstitutsiyaviy tuzumiga tajovuz qilish);
- 223-modda (Qonunga xilof ravishda chet elga chiqish yoki O‘zbekiston Respublikasiga kirish);
- 244-modda prim-2 (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atilib, qidiruv eʼlon qilingan.
Nuriddinov Xudoyor 2016-yilda Rossiyaga mehnat muhojiri sifatida borib, u yerda xalqaro terroristik tashkilotlar g‘oyalari taʼsiriga tushib, Suriyaning Idlib shahriga ketgan. U yerdan turib olib borgan targ‘ibot ishlari oqibatida bir qancha o‘zbekistonliklar janglarda ishtirok etib halok bo‘lgan.
Ayni vaqtda Nuriddinov Xudoyor ijtimoiy tarmoqlar va YouTube videoxostingi orqali o‘zining jinoiy qilmishlariga diniy tus berib, jihodga chorlovlarni davom ettirmoqda.
U tomondan yuritilayotgan sahifalar O‘zbekiston hududida taqiqlangan va uning ishtirokidagi videotasvirlarni saqlash, olib yurish va tarqatish jinoiy javobgarlikka sabab bo‘ladi.
Izoh (0)