AQSHning respublikachi va demokrat senatorlari Lindsi Grem va Richard Blyumental Davlat departamenti pozitsiyasini chetlab o‘tib, Rossiyani terrorizmga homiylik qiluvchi davlatlar ro‘yxatiga kiritish to‘g‘risidagi qonun loyihasini taqdim etdi, deb yozadi Politico.
“Ma’muriyat bu borada boshqacha fikrda ekanini juda yaxshi bilamiz. Hurmat ko‘rsatgan holda, men bu fikrga qo‘shilmayman”, — dedi Blumental matbuot anjumanida jurnalistlarga.
Davlat departamenti matbuot kotibi Ned Prays 14-sentabr kuni bo‘lib o‘tgan brifingda Rossiyani bu ro‘yxatga qo‘shish noxush oqibatlarga olib kelishi mumkinligini aytdi. Oq uy ham xuddi shunday pozitsiyada. Shu bilan birga, Prays AQSH ma’muriyati Kongress bilan muqobil choralarni muhokama qilayotganini ta’kidladi.
Avvalroq Rossiya Tashqi ishlar vazirligi terrorizmga homiylik qiluvchi davlatlar ro‘yxatiga kiritilish ikki tomonlama munosabatlarda “orqaga qaytmaslik nuqtasi” bo‘lishidan ogohlantirgan. Vazirlik agar bunday qaror qabul qilinsa, diplomatik munosabatlar to‘liq uzilishini istisno etmagan.
Rossiyani terrorizm homiysi bo‘lgan davlat deb tan olish g‘oyasi AQSHda apreldayoq paydo bo‘lgan, o‘shanda Davlat departamenti shunday imkoniyatni ko‘rib chiqayotganini ma’lum qilgandi. The Washington Post gazetasi esa shunday iltimos bilan AQSH prezidenti Jo Baydenga Ukraina yetakchisi Vladimir Zelenskiy murojaat qilganini yozgandi. Bunga javoban Bayden mazkur masalada aniq bayonotlar bermagan va rasmiy Moskvaga bosim o‘tkazishning turli yo‘llarini ko‘rib chiqishga tayyorligini ta’kidlagan.
Iyul oxirida AQSH Senati Davlat departamentini Checheniston, Gruziya, Suriya va Ukrainadagi voqealar munosabati bilan Rossiyani terrorizmning homiysi sifatida tan olishga chaqiruvchi rezolyutsiyani qabul qilgan edi.
Shu kungacha AQSH terrorizm homiysi sifatida to‘rtta davlatni tan olgan: Suriya (1979-yil dekabrda), Eron (1984-yil yanvarda), Shimoliy Koreya (2017-yil noyabrda) va Kuba (2021-yil yanvarda).
Sentabr oyi boshida Bayden Rossiyani terrorizm homiysi deb tan olish kerak deb hisoblash-hisoblamasligi haqidagi savolga “yo‘q” deb javob bergandi. Oq uy Bayden bunday chorani qo‘llamaslikka qaror qilganini tasdiqladi.
Izoh (0)