Turkiyaning barcha aeroportlari terroristik hujumlar tahdidi tufayli xavfsizlik choralarini kuchaytirdi. Bu haqda Hurriyet xabar berdi.
Hozirda aeroport terminallariga kiruvchi va chiqayotgan barcha avtomashinalar sinchiklab tekshirilmoqda va yo‘lovchilar shaxsi nazoratdan o‘tkazilmoqda. Istanbuldagi Sabiha Go‘kchen aeroportida esa yo‘lovchilarga ko‘riklar tufayli vaqtni yo‘qotmaslik uchun parvozdan kamida uch soat oldin kelish tavsiya etilgan. Bunday ehtiyot choralari 23-oktyabr kuni Turkiyaning TUSAS aerokosmik kompaniyasining Anqaradagi obyektida terakt sodir etilgani bilan bog‘liq.
Anqaradagi terakt
TUSAS aerokosmik korporatsiya obyektiga ayol va erkak qurolli hujum uyushtirgan. Hujumni amalga oshirganlar zararsizlantirilgan.
Qurbonlar soni 5 kishiga yetgan, yaradorlar esa 22 nafarni tashkil etmoqda. Ulardan uch nafari shifoxonadan chiqarilgan. Turkiya Ichki ishlar vaziri Ali Yerlikaya mamlakatda taqiqlangan Kurdiston Ishchi partiyasini hujumda gumon qilgan. Teraktdan so‘ng Turkiyda Suriya va Iroqdagi kurdlari obyektlarida havo hujumlari uyushtirgan. Oqibatda 50 dan ortiq nishon muvaffaqiyatli yo‘q qilingan. Havo operatsiyalari davom etmoqda.
Erdo‘g‘onning teraktga munosabati
Turkiyaga cho‘zilgan iflos qo‘llar sindiriladi. Xavfsizligimizga tahdid solayotgan birorta ham tuzilma, terror tashkiloti yoki yovuzlik o‘chog‘i o‘z maqsadiga erisha olmaydi. Terrorizm tahdidlarining barcha turlari va uning tarafdorlariga qarshi kurashimiz davom etaveradi, deya Turkiya prezidenti Rajab Toyyib Erdo‘g‘on teraktga munosabat bildirgan.
U Turkiya terrorchilar va ularning yordamchilariga qarshi barcha turdagi tahdidlarga qarshi qat’iyatli, keskin va ko‘p qirrali kurashni davom ettirishini ta’kidlagan.
Turkiyadagi o‘zbekistonliklar hushyorlikka chaqirildi
O‘zbekistonning Istanbuldagi Bosh konsulxonasi mamlakat fuqarolarini Anqaradagi teraktdan so‘ng Turkiyada joriy qilingan ehtiyot va xavfsizlik choralariga rioya qilishga chaqirdi.
Turkiyadan chiqib ketish arafasida bo‘lgan fuqarolardan aeroportlarga uchish uchun qayddan o‘tish (registratsiya) vaqtidan kamida 1 soat oldin yetib borishlari, shubhali buyumlar va shaxslar to‘g‘risida yaqin oradagi politsiya yoki xavfsizlikni ta’minlash (Özel güvenlik) bo‘linmalari xodimlariga xabar berishni tavsiya etiladi.
Izoh (0)