AQSH Ukraina va butun dunyo uchun kutilmagan oqibatlarga yo‘l qo‘ymaslik uchun Rossiyani terrorizm homiysi bo‘lgan davlat deb tan olish niyatidan voz kechgan. Bu haqda Oq uy matbuot kotibi Karin Jan-Pyer ma’lum qildi, deb yozadi “RBK”.
Avvalroq AQSH prezidenti Jo Bayden Rossiyani terrorizm homiysi deb tan olish kerak deb hisoblash-hisoblamasligi haqidagi savolga “yo‘q” deb javob bergandi. Oq uy Bayden bunday chorani qo‘llamaslikka qaror qilganini tasdiqladi.
“Bu olg‘a qadam tashlashning eng samarali yoki eng kuchli yo‘li emas”, — dedi Jan Pyer va “bunday deb tan olish Ukraina va dunyo uchun kutilmagan oqibatlarni keltirib chiqarishi mumkin”ligini qo‘shib qo‘ydi.
Xususan, bu gumanitar yordam yetkazib berishga ta’sir qilgan, don bitimining amalga oshirilishini xavf ostiga qo‘ygan, Ukrainani qo‘llab-quvvatlash bo‘yicha ko‘p tomonlama hamkorlikni susaytirgan va AQSHning muzokaralar jarayonlarida Kiyevga yordam berish imkoniyatlarini yo‘qqa chiqargan bo‘lardi, dedi Oq uy vakili. Jan-Pyerning so‘zlariga ko‘ra, Rossiyani “javobgarlikka” da’vat etish uchun AQSH iqtisodiy choralardan foydalanishda davom etadi.
Rossiyani terrorizm homiysi bo‘lgan davlat deb tan olish g‘oyasi AQSHda apreldayoq paydo bo‘lgan, o‘shanda Davlat departamenti shunday imkoniyatni ko‘rib chiqayotganini ma’lum qilgandi. The Washington Post gazetasi esa shunday iltimos bilan Baydenga Ukraina yetakchisi Vladimir Zelenskiy murojaat qilganini yozgandi. Bunga javoban Bayden mazkur masalada aniq bayonotlar bermagan va rasmiy Moskvaga bosim o‘tkazishning turli yo‘llarini ko‘rib chiqishga tayyorligini ta’kidlagan.
Politico ma’lumotlariga ko‘ra, Rossiyaga shunday maqom berilishini AQSH Kongressi Vakillar palatasi spikeri Nensi Pelosi talab qilib turib olgan. Biroq Davlat departamenti bunga qarshi chiqdi va bu, xususan, Ukraina donini Qora dengiz orqali eksport qilish haqidagi bitimga putur yetkazadi, deb hisobladi.
Moskva Vashingtonni mamlakatga terrorizm homiysi maqomi berilgan taqdirda, bu ikki tomonlama aloqalarda “orqaga qaytmaslik nuqtasi” yuzaga kelishiga sababchi bo‘lishi haqida ogohlantirdi.
Ukrainada urush boshlanganidan keyin Litva va Latviya parlamentlari Rossiyani terrorizmni qo‘llab-quvvatlovchi mamlakat deb e’lon qilgandi.
Iyul oxirida AQSH Senati Davlat departamentini Checheniston, Gruziya, Suriya va Ukrainadagi voqealar munosabati bilan Rossiyani terrorizmning homiysi sifatida tan olishga chaqiruvchi rezolyutsiyani qabul qilgan edi.
Shu kungacha AQSH terrorizm homiysi sifatida to‘rtta davlatni tan olgan: Suriya (1979-yil dekabrda), Eron (1984-yil yanvarda), Shimoliy Koreya (2017-yil noyabrda) va Kuba (2021-yil yanvarda).
Boshqa davlatning terrorizm homiysi sifatida tan olinishi bu davlat bilan o‘zaro munosabatlarni qattiq cheklash, unga mudofaa tovarlarini eksport qilishni taqiqlash, ikki maqsadli mahsulotlar (ham fuqarolik mahsulotlari, ham qurol yaratishda ishlatiladigan) eksportini nazorat qilish, moliyaviy va boshqa cheklovlarni nazarda tutadi. Davlat departamenti veb-saytida aytilishicha, qaror, shuningdek, “terrorizmga homiylik qiluvchi davlatlar bilan savdo qilgan shaxslar va mamlakatlarni jazolaydigan boshqa sanksiyalar to‘g‘risidagi qonunlarni” kiritishni ham nazarda tutadi. Bu shuni anglatadiki, AQSH sanksiyalari iqtisodiyotning ayrim tarmoqlari bilan cheklanib qolmaydi, deya ta’kidladi Politico.
Izoh (0)