Nikaragua Isroil bilan diplomatik aloqalarini uzganini e’lon qildi. Bu haqda Reuters xabar berdi.
Mamlakat rasmiylari bunga sabab sifatida Isroil armiyasining Falastin hududidagi harbiy harakatlarini keltirmoqda. Nikaragua Milliy assambleyasi hukumatdan G‘azodagi urushning bir yilligi uchun chora ko‘rishni talab qiluvchi rezolyutsiyani qabul qilgan. Parlament Isroil hukumatini tanqid qiluvchi bayonot e’lon qilgan. Unda Nikaragua assambleyasi Isroilni “insoniyat dushmani”, uning harakatlarini esa “jinoyat” deb atagan. Bayonotda mojaroning mintaqaning boshqa mamlakatlariga, jumladan, Livan, Suriya, Yaman va Eronga ham yoyilgani ta’kidlangan.
2023-yilning noyabr oyida Boliviya ham Isroil bilan diplomatik munosabatlarni uzganini e’lon qilgandi. Qo‘shni Kolumbiya va Chili esa o‘z elchilarini Isroildan maslahatlashish uchun chaqirib olgan. O‘shanda Isroil Tashqi ishlar vazirligi Boliviyaning bu qarorini terrorizm oldida taslim bo‘lish, deb baholagandi. Turkiya esa yahudiy davlati bilan savdo aloqalarini to‘xtatgan.
Izoh (0)