AQSH Kongressi Rossiyani “agressor davlat” deb tan oluvchi qonun loyihasini ishlab chiqmoqda, deya xabar berdi The Hill. Nashrning Kongressdagi manbalariga tayanib yozishicha, hozir qonun loyihasi matni prezident Jo Bayden ma’muriyati bilan muhokama qilinmoqda. Ular bu qonun Rossiyani “terrorizm homiysi” deb atamaslik uchun zarur ekanini aytdi.
Agar qonun loyihasi qabul qilinsa, AQSH prezidenti Rossiyani va “Ukrainaga qarshi agressiv harakatlarga aloqador” deb hisoblangan istalgan xorijiy davlatni “agressor davlat” deb e’lon qilishi mumkin bo‘ladi. Shuningdek, hujjat AQSH prezidentiga “tajovuz uchun javobgar bo‘lgan yoki unga aloqador” har qanday shaxsga nisbatan sanksiyalar qo‘llash imkonini beradi”, deb ta’kidlaydi gazeta. Ammo matn tanqidchilarining aytishicha, qo‘shimchalar ortiqcha, chunki Jo Bayden ma’muriyati Rossiyaning yuqori martabali amaldorlariga nisbatan allaqachon sanksiyalar kiritgan.
Hujjat shuningdek, “agressor davlat” atamasi “terrorizmga homiylik qiluvchi davlat” atamasidan “ritorik jihatdan kuchsizroq” bo‘lgani uchun ham tanqid qilinmoqda, deb ta’kidladi The Hill.
Ismi oshkor qilinmagan Ukraina rasmiylarining nashrga aytishicha, “agressor davlat” maqomi ularning Rossiyani terrorizm homiysi sifatida tan olish haqidagi iltimosiga mos kelmaydi. Shunga qaramay, ularning fikricha, Kiyev bu chorani qo‘llab-quvvatlashi mumkin, ayniqsa buning ortidan “agressor davlatlarni jazolash uchun qo‘shimcha vositalar” ishlab chiqilsa.
23-noyabr kuni Yevroparlament Rossiyani Ukrainadagi harbiy amaliyotlar munosabati bilan terrorizmga homiylik qiluvchi davlat sifatida tan olish to‘g‘risidagi rezolyutsiyani qabul qilgandi. Hujjat yuridik kuchga ega emas va maslahat xarakteriga ega, chunki Yevropa Ittifoqi qonunchiligida “terrorizmni homiylik qiluvchi davlat” tushunchasi hali mavjud emas. Yevropa Ittifoqiga kiruvchi qator davlatlar, xususan, Litva, Latviya, Polsha, Estoniya ham xuddi shunday hujjatlarni qabul qildi.
AQSH qonunchiligida esa “terrorizm homiysi bo‘lgan davlat” ta’rifi mavjud va biror davlatni bunday ro‘yxatga kiritish to‘g‘risidagi qaror Davlat departamenti tomonidan qabul qilinadi. Hozir unga Suriya, Eron, Shimoliy Koreya va Kuba kiradi. Qo‘shma Shtatlar tomonidan har qanday davlatning terrorizm homiysi sifatida tan olinishi jiddiy cheklovlarni nazarda tutadi: mudofaa sektori uchun tovarlar eksportini taqiqlash, ham fuqarolik, ham harbiy maqsadli mahsulotlar eksportini nazorat qilish, moliyaviy cheklovlar va boshqalar. Shuningdek, qonunga ko‘ra, agar biror davlat terrorizm homiysi sifatida tan olinsa, Qo‘shma Shtatlar u bilan savdo aloqalarini saqlab turgan boshqa davlatlarga nisbatan sanksiyalar qo‘llashi mumkin.
Izoh (0)