Isroil G‘azo sektoridagi Rafah shahri xarobalari o‘rniga qurishni rejalashtirgan “gumanitar shahar” falastinliklar uchun konslager bo‘ladi. Bu haqda Isroil sobiq bosh vaziri Ehud Olmert ma’lum qildi.
Lager qurish buyrug‘i yahudiy mudofaa vaziri Isroil Kats tomonidan berilgan. Obyekt 600 ming falastinlikni joylashtirishga mo‘ljallangan. Olmert mazkur lagerga falastinliklarni majburan ko‘chirish “etnik tozalash” hisoblanishini aytdi.
Isroil allaqachon G‘azo va G‘arbiy Sohilda harbiy jinoyatlar sodir etmoqda, lager qurilishi esa vaziyatni yanada keskinlashtiradi, dedi Isroil sobiq bosh vaziri.
U G‘azo aholisini majburiy ko‘chirish “insoniyatga qarshi jinoyatlar rejasi” hisoblanishini ta’kidladi.
Bu konslager bo‘ladi. Afsuski, shunday. Agar falastinliklar yangi “gumanitar shahar”ga majburan ko‘chirilsa, buni etnik tozalashning bir qismi deyish mumkin. Bu hali sodir bo‘lgani yo‘q, dedi u va lagerga kirgan falastinliklarga tashqariga chiqishga ruxsat berilmasligini aytdi.
Siyosatchi Isroilning hozirgi harbiy kampaniyasini etnik tozalash deb hisoblamasligini bildirdi. Uning fikricha, tinch aholini jangovar harakatlardan himoya qilish maqsadida evakuatsiya qilish xalqaro huquqqa ko‘ra qonuniy hisoblanadi. Chunki falastinliklar harbiy operatsiyalar tugagandan so‘ng hududlarga qaytmoqda.
“Gumanitar shahar” loyihasi Isroil bosh vaziri Binyamin Netanyaxu tomonidan qo‘llab-quvvatlangan. Loyihani ilgari surgan Kats bir necha bor “G‘azoni tozalash” kerakligini aytgan. Shu sababli Olmert lager falastinliklarni himoya qilishga qaratilmaganini aytmoqda.
Ular lager orqali G‘azoning yarmidan ko‘pini “tozalash”ni rejalashtirgan. Maqsad — falastinliklarni deportatsiya qilish, siqib chiqarish va tashqariga uloqtirishdir. Men buni boshqacha tushuna olmayman, degan Isroil sobiq bosh vaziri.
Isroillik inson huquqlari bo‘yicha advokatlar va olimlar bu rejani “insoniyatga qarshi jinoyatlar rejasi” deb ta’riflagan. Ba’zilar agar qurilish amalga oshsa, “vaziyat ma’lum sharoitlarda genotsid jinoyatiga aylanishi mumkinligi” haqida ogohlantirgan.
Izoh (0)