G‘azoda bir kun ichida 82 nafar falastinlik Isroil armiyasi bergan zarbalar oqibatida halok bo‘ldi. Bu haqda Al Jazeera xabar berdi.
Al-Shifo shifoxonasining ma’lum qilishicha, so‘nggi o‘limlar Jabaliya an-Nazla shahrida ko‘chirilgan falastinliklarga boshpana qilib berilgan maktabda sodir bo‘lgan. Hududga havo hujumi uyushtirilgan.
Bu orada xalaqaro hamjamiyat sektorga alohida e’tibor qaratib kelmoqda. Jumladan, Misr va Xitoy G‘azoni qayta tiklash bo‘yicha xalqaro sa’y-harakatlarga chaqirmoqda. Bu chaqiriq Misr prezidenti Abdulfattoh as-Sisi 10-iyul kuni Misr bosh vaziri Mustafo Madbuliy huzurida Xitoy Davlat kengashi bosh vaziri Li Syanni qabul qilganida bildirilgan.
Tomonlar mintaqada o‘t ochishni to‘xtatish, gumanitar yordamning zudlik bilan yetkazilishini ta’minlash hamda G‘azo muammosini adolatli hal qilish zarurligini ta’kidlagan. Yuqori martabali amaldorlar, shuningdek, G‘azoni qayta tiklashga qaratilgan loyihani amalga oshirish uchun xalqaro qo‘llab-quvvatlashni zudlik bilan safarbar qilish zarurligini bildirgan.
Qohirada 4-mart kuni Arab davlatlari sammitining navbatdan tashqari sessiyasida “G‘azoni qayta tiklash rejasi” qabul qilingandi. Yetakchilar ushbu rejani amalga oshirish uchun darhol global qo‘llab-quvvatlash lozimligi qo‘shimcha qilingan. Reja 6 oylik muddat ichida G‘azo sektorini boshqarish uchun G‘azoni boshqarish qo‘mitasini tashkil etishni nazarda tutadi.
Izoh (0)