Uzoq yillar ideal oila sifatida tanilgan yulduzli juftliklar ancha vaqt davomida birgalikda umr kechirganiga qaramay, ba’zan ajralishga majbur bo‘ladi. Bunday qarorga kelishga ulardagi shaxsiy muammolar, oiladagi kutilmagan burilishlar yoki shunchaki yangi baxtni izlash istagi sabab bo‘ladi. Quyida nikohi uzoq yillar davom etganiga qaramay, ajrimni tanlagan mashhurlar haqida so‘z boradi.
Keti Perri va Orlando Blum — 9 yillik munosabat
Keti va Orlando 2016-yilning yanvarida “Oltin globus” mukofoti taqdimoti kechasida tanishgan. Tez orada ular orasida iliq munosabat shakllangan va bir oy o‘tmay Orlando uni o‘g‘li Flinn bilan tanishtirgan. Juftlik 2017-yilda qisqa muddatga ajrashgan bo‘lsa-da, 2018-yilda yana yarashgan. 2019-yilning 14-fevralida unashtirilgan, ammo 2020-yilga rejalashtirilgan to‘y pandemiya sabab ortga surilgan va oxir-oqibat umuman amalga oshmagan. Shu yilning avgustida ularning qizi Deyzi Dav Blum tug‘ilgan.
2025-yil boshlarida ular orasida masofa paydo bo‘la boshladi. Ketining yangi “143” albomi muxlislar va tanqidchilar tomonidan salbiy baholandi. Bu holat unga kuchli psixologik ta’sir ko‘rsatdi. Orlandoning esa bunga befarqligi, hattoki albomni ortiqcha shov-shuvga arzimaydi deb baholagani, Ketini ranjitdi.
Asosiy kelishmovchilik esa Ketining Blue Origin kompaniyasi bilan amalga oshirgan kosmik parvozi bo‘ldi. U buni o‘z hayotidagi muhim bosqich sifatida qabul qilgan bo‘lsa, Orlando buni keraksiz va g‘alati qadam deb bilgan. Shunga qaramay, ular do‘stona munosabatni saqlab qolishga va qizlari Deyzini birgalikda tarbiyalashga kelishgan.
Hyu Jekman va Deborra-Li Ferness — 27 yillik turmush
Bu juftlik 1995-yilda Avstraliyada “Korelli” teleseriali suratga olinayotgan paytda tanishgan. Oradan to‘rt oy o‘tmay Hyu unga turmush qurishni taklif qilgan. Ular 1996-yil 11-aprelda oila qurib, keyinchalik ikki farzand — Oskar (2000-yilda) va Ava (2005-yilda)ni asrab olgan.
2023-yil sentabrida, 27 yil birga yashaganidan so‘ng, ular ajralishga qaror qilganini e’lon qilishdi. Rasman bu qaror “shaxsiy rivojlanish istagi” bilan izohlangan.
Riz Uizerspun va Jim Tot — 11 yillik nikoh
Aktrisa Rayan Filipp bilan ajrashgach ikkita farzandi: Dikon va Ava bilan qolgan. “Men yolg‘iz ona bo‘lib qolishdan qattiq tashvishlanganman. Stress va xavotir hissi meni qiynagan”, degan Riz intervyulardan birida. Uning hayoti agent Jim Tot bilan uchrashganidan keyin o‘zgargan. Bolalarga ma’sul bo‘lishdan qochmagan Jim Rizga turmush qurishni taklif qilgan. 2012-yil sentyabrida ularning o‘g‘li Tennessi Jeyms tug‘ilgan. Jim, shuningdek, Rizning avvalgi turmushidan bo‘lgan ikki farzandining tarbiyasida ham faol ishtirok etgan.
2023-yil mart oyida, to‘ylari 12 yilligiga oz qolganida, ular ajrashish qarorini e’lon qilishdi. Sud hujjatlarida sabab “murosaga erishib bo‘lmaydigan kelishmovchiliklar” deb ko‘rsatildi. Ajrim 2023-yil avgustida rasmiylashtirildi. Juftlik hozirda farzandlari uchun do‘stona munosabatni saqlab qolishga harakat qilmoqda.
Jessika Simpson va Erik Jonson — 10 yillik turmush
Qo‘shiqchi Jessika va amerikalik futbolchi Erik 2010-yilda tanishib, oradan olti oy o‘tmay unashtirildi. 2014-yil yozida Kaliforniyadagi Monterito kurortida to‘y qilishdi. Oilada ularning uch farzandi tug‘ildi.
2025-yil boshida juftlik ajrashayotganini rasman e’lon qildi. Jessika nikohdagi sovuqlik va turmush o‘rtog‘ining befarqligini bunga sabab qilib ko‘rsatdi. Keyinchalik uning ijodida Erikka nisbatan ishonchsizlik va xiyonat mavzulari paydo bo‘ldi. Ajralish qiyin kechgan bo‘lsa-da, ular farzandlar manfaati yo‘lida o‘zaro hurmatli munosabatni saqlashga harakat qilmoqda.
Jessika Alba va Kesh Uorren — 16 yillik munosabat
Aktrisa Jessika Alba va prodyuser Kesh Uorren 2004-yilda “Fantastik to‘rtlik” filmini suratga olish chog‘ida tanishgan. 2008-yil may oyida yashirincha turmush qurgan. Ularning uch nafar Honor, Heyven va Heys ismli farzandlari bor.
2024-yildan boshlab juftlik o‘rtasida sovuqlik kuchaya boshlagan va 2024-yil dekabrida ular ajrashayotganini rasman e’lon qilgan. 2025-yil 7-fevralda rasmiy hujjatlar topshirilgan. Alba munosabatlarini “turmush qurmagan qo‘shnilar”ga qiyoslagan. Ajralish janjallarsiz o‘tgan.
Jeff Bezos va Makkenzi Skott — 25 yillik nikoh
Amazon asoschisi Jeff Bezos va yozuvchi Makkenzi Skott 1993-yilda tanishib, o‘sha yilning o‘zida turmush qurishgan. Ular Amazon kompaniyasini birga tashkil etishgan. Makkenzi dastlabki yillarda hisob-kitob, kadrlar bilan shug‘ullangan. Ular to‘rt farzand ko‘rgan va yana bir bolani asrab olgan.
2019-yil yanvarida juftlik ajrashishini e’lon qildi. Bu Bezosning jurnalist Loran Sanches bilan munosabatlari oshkor bo‘lganidan so‘ng yuz berdi. Ajrim hech qanday muammolarsiz o‘tdi. Makkenzi Amazon’dagi 25% ulushini olib, o‘sha zahoti dunyodagi eng boy ayollardan biriga aylandi. U boyligining katta qismini xayriya ishlari uchun sarflamoqda.
Izoh (0)