Isroil harbiy havo kuchlari tomonidan 12 kunlik urush davomida berilgan zarbalardan birida Eron prezidenti Masʼud Pezeshkiyon jarohat olgan. Bu haqda Iran International xabar berdi.
Eronning Fars agentligi tafsilotlarga aniqlik kiritib, hujum Oliy xavfsizlik kengashi yig‘ilishi bo‘lib o‘tayotgan binoga berilganini maʼlum qildi.
Manbalarga ko‘ra, Isroil bu operatsiyani “Hizbulloh” yetakchisi Hasan Nasrullohga uyushtirilgan suiqasdga o‘xshash usulda amalga oshirgan. Isroil samolyotlari binoning kirish va chiqish joylarini nishonga olib, evakuatsiya yo‘llarini to‘sib qo‘ygan.
Zarbalar sabab binoda elektr uzilgan. Rasmiylar favqulodda chiqish eshigi orqali tashqariga chiqishga muvaffaq bo‘lgan. Prezident Pezeshkiyon ayni shu yerda oyog‘idan jarohat olgan.
Avvalroq eronlik qo‘mondon Mohsen Rezoiy Fars agentligiga intervyu berib, Isroil havo kuchlari Oliy xavfsizlik kengashi yig‘ilishi vaqti olti nuqtaga zarba berganini aytgan edi.
Isroil va Eron: 12 kunlik urush
Joriy yilning 13-iyun kunidan boshlab Eronning qator hududlariga berilgan zarbalarda mamlakat harbiy esholonining yuqori martabali qo‘mondonlari hamda yadro fiziklari o‘ldirildi. Qolaversa, qator yadroviy obyektlar nishonga olindi.
Eron esa bunga javoban Isroilga raketa zarbalari yo‘lladi. 22-iyun kuni mojaroga AQSH ham aralashib, Fordo, Natanz va Isfahondagi yadroviy obyektlarga “bunker teshuvchi” bombalar bilan zarba berdi. 24-iyun kuni esa sulh e’lon qilindi.
Izoh (0)