Germaniyada shifokor 14-iyul kuni 15 nafar bemorni o‘ldirganlikda ayblanib, sud qilindi. Bu haqda Arab News xabar berdi.
Nemis ommaviy axborot vositalari tomonidan Yoxannes M. deb yuritilayotgan 40 yoshli shifokor 2021-yil sentyabridan 2024-yil iyuligacha Berlindagi shifoxonalardan birida ishlagan. U faoliyati davomida 12 nafar ayol va 3 nafar erkakni o‘ldirganlikda ayblanmoqda.
Ta’kidlanishicha, shifokor 25 dan 94 yoshgacha bo‘lgan jabrlanuvchilarga ularning xabari yoki roziligisiz og‘riqsizlantiruvchi va mushaklarni bo‘shashtiruvchi (relaksant) dorilar yuborgan. Relaksant nafas olish mushaklarini falajlab, nafasning to‘xtashiga va bir necha daqiqa ichida o‘limga olib kelgan. Shu tariqa, Yoxannes o‘zining jinoyatlarini yashirish maqsadida bemorlarning uylariga o‘t qo‘ygan.
“Ayblanuvchi tibbiy yordam ko‘rsatish bahonasida bemorlarning uyiga borgan. Uning tashriflardan maqsadi faqatgina o‘ldirish bo‘lgan. U bemorlarining ishonchini suiiste’mol qilgan va insonlar hayotiga bepisandlik bilan qaragan. Yoxannes o‘zini hayot va o‘lim hukmdori sifatida tutgan”, dedi prokuror Filipp Meyxofer sudda.
Shifokorning hamkasblaridan biri 2024-yilning iyun oyida Yoxannesdan shubhalanishni boshlagan. Chunki uning ko‘plab bemorlari aynan yong‘inlarda halok bo‘layotgan edi. Yoxannes avgust oyida hibsga olingan, prokurorlar dastlab uni 4 ta o‘limda ayblagan. Ammo keyingi tergovlar boshqa ko‘plab shubhali holatlarni ochib bergan. Aprel oyida prokurorlar Yoxannesni 15 ta qotillik bo‘yicha jinoiy javobgarlikka tortgan.
Prokurorlarning ta’kidlashicha, yana 96 ta ish hali ham tergov qilinmoqda, jumladan, shifokorning qaynonasi o‘limi ham tekshirilmoqda. Ta’kidlanishicha, ayol saraton kasalligidan aziyat chekkan. Yoxannes va uning rafiqasi 2024-yil boshida ayolni ko‘rish uchun Polshaga borganida u sirli ravishda vafot etgandi.
Izoh (0)