Wizz Air aviakompaniyasi geosiyosiy va operatsion muammolar tufayli joriy yil sentyabr oyidan boshlab Abu-Dabi (BAA) shahridan barcha reyslarni to‘xtatishni rejalashtirganini ma’lum qildi. Bu haqda Wizz Air aviakompaniyasi o‘zining X saytidagi sahifasida xabar berdi.
Ma’lum qilishicha, 1-sentyabrdan boshlab Abu-Dabidagi markazidan faoliyatini to‘xtatish to‘g‘risidagi qaror kompaniyaning Markaziy va Sharqiy Yevropadagi asosiy bozorlariga e’tiborini qaratish maqsadida qabul qilingan.
Shuningdek, asosiy sabablar sifatida issiq havo sharoitida Pratt & Whitney GTF dvigatellari bilan bog‘liq muammolarning cho‘zilib ketgani, havo bo‘shlig‘ining yopilishi va iqtisodiy samaradorlikning yo‘qligi ham ko‘rsatilgan. Ta’kidlanishicha, bularning barchasi 2020-yilda Yaqin Sharqqa kirgan Wizz Air uchun juda arzon biznes modelini saqlab qolishni imkonsiz qiladi.
Kompaniya bosh direktori Yojef Varadi o‘z bayonotida kompaniya “Yaqin Sharqda katta yo‘lni bosib o‘tganini” ta’kidlagan. Biroq, uning qo‘shimcha qilishicha, “faoliyat sharoitlari sezilarli darajada o‘zgargan”.
“Yetkazib berish zanjiridagi cheklovlar, geosiyosiy beqarorlik va bozorga kirish imkoniyatining cheklanganligi dastlabki maqsadlarimizni saqlab qolishni tobora qiyinlashtirmoqda”, dedi Varadi.
Kompaniyaning ushbu qarori O‘zbekiston va BAA o‘rtasidagi parvozlariga ham ta’sir qiladi. Ijtimoiy tarmoqlarda yozishlaricha, ushbu yo‘nalishda sentyabrdan chiptalar ko‘rsatmayapti.
Wizz Air — Vengriyaning loukoster aviakompaniyasi bo‘lib, shtab-kvartirasi Budapeshtda joylashgan. Wizz Air 2022-yil dekabr oyidan Abu Dabidan Samarqandga, yanvar oyidan esa Abu Dabi—Toshkent—Abu Dabi yo‘nalishi bo‘yicha muntazam reyslarni amalga oshirmoqda.
2024-yil aprelida Wizz Air Yevropa poytaxtlari va O‘zbekiston shaharlari o‘rtasida to‘g‘ridan to‘g‘ri reyslarni yo‘lga qo‘yishdan manfaatdorligi ma’lum qilingandi.
Izoh (0)