Baqlajon ko‘plab milliy va zamonaviy taomlarning tarkibiy qismi hisoblanadi. Ammo noto‘g‘ri tanlangan yoki yetishtirilgan baqlajon taxir ta’mi bilan butun taomning sifatiga putur yetkazishi mumkin. Quyida ushbu sabzavotning achchiqlik sababi va undan qanday xalos bo‘lish mumkinligi haqida so‘z yuritamiz.
Nega ba’zi baqlajonlar ta’mi taxir bo‘ladi?
Baqlajonning bunday yoqimsiz ta’mi solanin nomli modda bilan bog‘liq. U ituzumdoshlar oilasiga kiruvchi sabzavotlarda, jumladan pishmagan pomidor, qalampir, yangi chiqqan kartoshka, qalampir va ayniqsa baqlajonlarda uchraydi. Baqlajonlarda solanin moddasi ko‘proq noto‘g‘ri parvarishlash — masalan, yetarli sug‘ormaslik, issiqxonaning haddan tashqari qizib ketishi yoki azotli o‘g‘itlarning ortiqcha miqdorda berilishi sababli to‘planadi.
Solanin inson salomatligi uchun xavfli bo‘lishi mumkin, u hatto zaharlanishga ham olib keladi. Ayniqsa, hali to‘liq pishmagan baqlajonlarda bu modda ko‘p bo‘ladi. Biroq baqlajonning pishgan-pishmaganini tashqi ko‘rinishiga qarab aniqlash har doim ham oson emas. Shu bois, sabzavotning ichki qismidan ozgina tatib ko‘rish tavsiya etiladi.
Sifatli baqlajonni tanlash qoidalari
Do‘konda yoki bozorda baqlajon tanlayotganda mayda yoki o‘rtacha kattalikdagi, silliq, qalin po‘stloqli va bir xil rangdagi sabzavotlarga ahamiyat bering. Bunday baqlajonlar yirik va yumshoq bo‘lganlariga qaraganda mazaliroq bo‘ladi. O‘z bog‘ingizda yetishtirayotgan bo‘lsangiz, baqlajonlar haddan ortiq o‘sib ketmasidan avval ularni terib olishga harakat qiling. Shuningdek, oq po‘stlog‘li navlar deyarli hech qachon taxir ta’mga ega bo‘lmaydi.
Agar siz taxir baqlajonni sotib olgan yoki yetishtirgan bo‘lsangiz, uni darrov tashlab yubormang. Quyidagi oson usullar bilan solanindan xalos bo‘lish mumkin.
Tuz yordamida achchiqlikni ketkazish
Bu usul sabzavotning shaklini saqlab qoladi va uni keyinchalik bo‘laklash, maydalash yoki butun holda pishirishga imkon beradi.
Baqlajonni yuving, quriting va bandini kesib tashlang.
Uni uzuniga ikkiga bo‘ling.
Ichki qismiga yirik tuz seping. Mayda tuz ishlatish tavsiya etilmaydi, chunki u erib, singib ketadi va baqlajonni haddan ortiq sho‘r qilib yuboradi.
Baqlajonni xona haroratida 25–30 daqiqa qoldiring, u sharbat ajrata boshlaydi.
So‘ng suvda yaxshilab yuvib tashlang va kerakli taomni tayyorlashga kirishing.
Tuzli eritmada achchiqlikni yo‘qotish
Agar baqlajonni rulet yoki salat uchun bo‘lakchalarga kesish kerak bo‘lsa, bu usul ayni muddao.
Baqlajonni yuving, bandini olib tashlang.
Uni dumaloq yoki uzun bo‘laklarga kesing (1–2 sm qalinlikda). Ragu yoki salat uchun kubik shaklida ham to‘g‘rash mumkin.
3. Chuqur idishga suv quying, tuz soling va eriguncha aralashtiring.
4. Baqlajon bo‘laklarini eritmaga soling.
5. Ustiga likopcha bilan yoping va uning ustidan og‘ir buyum qo‘ying. Bu usul barcha baqlajon bo‘laklari suvga botishiga yordam beradi.
6. 20–30 daqiqadan so‘ng baqlajonlarni suvda chayib, pishirishga o‘ting.
Muzlatish orqali achchiqlikni kamaytirish
Bu usul ko‘proq vaqt talab qiladi. Muzlab, so‘ng erigan baqlajon yumshoqroq bo‘ladi, shuning uchun pishirish (ayniqsa qovurish) vaqtini qisqartiradi.
Baqlajonni yuving, quriting, bandini olib tashlang.
Uni istalgan shaklda kesing.
Bo‘laklarni bir qatlamda taxtacha yoki likopga joylab, muzlatkichga 4 soatga qo‘ying.
Muzi erigach, sabzavot yanada xushta’m va ancha yumshoq bo‘ladi. Endi uni pishirishga kirishishingiz mumkin.
Izoh (0)